'Paremos o saqueo', lema da CIG para a manifestación do 1º de maio reivindicando a acción sindical de "confrontación"
Por Mónica Patxot & Anxo Lourido
"A situación que estamos denunciando é de absoluta gravidade, non só no ámbito laboral senón social", afirmou Marcos Conde, secretario comarcal da CIG, na presentación da manifestación do 1º de maio que ofreceu xunto a Diana Rodríguez, integrante da executiva comarcal do sindicato nacionalista.
Os representantes da CIG afirman que o concepto de "traballador pobre" veu para quedar e que, nunha inmensa parte da poboación, tanto o persoal laboral como as persoas xubiladas viven nunha precariedade absoluta. Afirman que a reforma laboral deu por bo o despedimento libre, o "despido barato", e en lugar de mellorar a contratación indefinida estendeuse o contrato fixo descontinuo de maneira "brutal" coa normalización do despedimento de traballadores indefinidos e sen estabilizar o emprego.
En canto ás pensións, a CIG critica o aplauso que recibiu a reforma por parte das mesas de diálogo cando se "confirma que a xubilación vai a 67 anos e o cómputo vai a 20 anos", denuncia Marcos Conde, alertando de que os traballadores que se xubilen agora terán pensións inferiores aos de anos previso. Advirte, ademais, de que numerosas traballadoras atoparanse coa imposibilidade de alcanzar o tope de anos para obter unha xubilación parcial.
Diana Rodríguez mostrou a súa preocupación polo "secuestro" da negociación colectiva por parte da patronal e pola actitude de UGT e CCOO nas mesas de diálogo imposibilitando recuperar o poder adquisitivo dos salarios. "Ter traballo hoxe en día non significa ter ingresos dignos", expuxo.
Indicou tamén que a partir de 2020 multiplicáronse por catro os contratos temporais e os fixos descontinuos e que a Inspección de Traballo detectou 27.000 contratos fixos descontinuos en fraude de lei. Por iso sinalou a importancia da negociación dos convenios que deben afrontarse neste 2023 como o de ambulancias, limpeza, alimentación, hostalería, oficinas e despachos.
"A mobilización e saír á rúa coa CIG é un inicio para recuperar o poder adquisitivo perdido durante estes anos", apuntou Diana Rodríguez.
Marcos Conde: "hai traballadores estables, fixos, que non chegan a fin de mes"
A estes condicionantes laborais súmase a carestía da vida e o incremento dos prezos durante os últimos anos provocando que sexa moi complicado chegar a fin de mes, expón Conde ao asegurar que "hai traballadores estables, fixos, que non chegan a fin de mes. A compra no supermercado fíxose imposible".
Culpa desta situación ao Goberno do Estado por manter a liña marcada pola Unión Europea que está ao "ditado das grandes corporacións contrarias á clase traballadora" e tamén critican a xestión da Xunta "desaparecida na busca de solucións" lembrando que a administración autonómica ten competencias en política industrial, máis aló do turismo e do Xacobeo. Neste sentido, Marcos Conde lamentou a espoliación dos recursos naturais de Galicia, tanto eólicos como enerxéticos.
Por este motivo, desde a CIG sinalan que é necesario saír á rúa destacando que os "propios traballadores temos que darnos conta de que cando nos mobilizamos conseguimos cambios e avanzar", facendo un chamamento a participar na manifestación que en Pontevedra comezará ás 11.30 horas do luns 1 de maio na praza da Ferrería e finalizará na Praza do Teucro.
En Vilagarcía, a manifestación da central nacionalista tamén comezará ás 11.30 horas da Casa do Mar e na Estrada está prevista ás 12.00 horas na Praza do Mercado.
DIVISIÓN SINDICAL
Sobre a división sindical que se producirá este ano con catro manifestacións distintas durante esa xornada na capital, Marcos Conde aclarou que a CIG ten unha liña sindical moi diferenciada de CCOO e UGT, centrais que tamén convocan dous actos separados, a diferenza dos últimos anos.
"Nós vamos de forma unitaria na negociación colectiva ou conflitividade onde a liña é común, pero o que non facemos é perder o tempo en cambalaches nin en historias. Nós temos a nosa forma de actuar", argumentou o secretario comarcal da CIG.
"A suba do salario incrementouse un 5,7 en Galiza, case dous puntos máis que no resto do Estado o ano pasado, pola acción sindical, e o dicimos con orgullo, de confrontación", sentenció Marcos Conde en defensa das propostas do seu sindicato.
Relacionadas:
-
A CIG convoca tres xornadas de folga en abril no sector de oficinas e despachos
Por Anxo Lourido |
-
Continúa a folga do sector das ambulancias ante a falta de noticias da patronal
Por Almu Dapena |
-
Primeira xornada de folga no sector das ambulancias con petición de melloras salariais e laborais
Por Cristina Saiz & Anxo Lourido |
-
Xornada de folga da CIG no sector de comercio da alimentación por falta de acordo coa patronal
Por Redacción |
-
Protesta da CIG fronte AEMPE polo V Acordo polo Emprego e a Negociación Colectiva
Por Mónica Patxot & Redacción |
-
A plataforma Queremos Galego sairá á rúa o 17 de maio para reclamar o uso da lingua galega
Por Redacción & Juan Manuel García Tajes |
-
O BNG presenta alegacións ao proxecto do Parque Eólico "Ampliación Penizas"
Por Redacción |
-
A CIG alerta da situación de emerxencia social que vive o país pola precarización laboral
Por Cristina Saiz & Anxo Lourido |
-
UGT considera "un gran erro" que CCOO decidira separarse neste 1º de maio en Pontevedra
Por Anxo Lourido |
-
Comeza a folga indefinida en Hiperxel
Por Mónica Patxot & Anxo Lourido |
-
Folga das traballadoras de H&M, que pechan a tenda de Benito Corbal
Por Redacción & Cristina Saiz |
-
A CIG acusa a patronal hostaleira de pagar salarios máis baixos que hai tres anos
Por Anxo Lourido |
-
Pensionistas e persoas xubiladas da CIG concéntranse contra a exclusión dixital
Por Redacción |
-
"As pensións non se tocan", a demanda da CIG no Día da Clase Obreira Galega
Por Mónica Patxot & Redacción |