Cuntis, Caldas, Portas, Moraña e Barro manterán pechados parques infantís e piscinas municipais todo o verán
Por Redacción
Nin piscinas municipais nin parques infantís durante todo o verán nos concellos de Cuntis, Caldas de Reis, Portas, Moraña e Barro.
Os alcaldes destes cinco municipios tomaron esta decisión de maneira conxunta como medida extraordinaria para garantir a seguridade dos seus veciños ante o coronavirus.
Así o confirmaron nun comunicado, no que xustifican a medida polos protocolos establecidos polas autoridades sanitarias para a apertura deste tipo de instalacións e que son, a día de hoxe, de difícil cumprimento facendo imposible que se reabran con todas as garantías de protección.
"Non se conta cos medios necesarios para garantir ao 100% o cumprimento das normas", explican no texto.
En relación ás piscinas, a normativa establece a obrigatoriedade de realizar labores continuos de limpeza e desinfección, distancia interpersoal de 2 metros, limitacións de aforo a un terzo ou tempo de permanencia limitado, entre outros asuntos, mentres que para os parques infantís obrígase á limpeza e desinfección diaria ou a limitar o aforo a un neno por cada 4 metros cadrados.
A súa aplicación, defenden, "impediríalles aos usuarios e usuarias gozar da tranquilidade e a diversión que se busca ao acudir a este tipo de instalacións".
"Os Concellos de Cuntis, Caldas de Reis, Portas, Moraña e Barro rogan desculpas polas molestias que esta decisión poida provocar e comunican que se aproveitará este tempo para realizar as melloras necesarias para que, cando a situación o permita, volvan abrir as piscinas con todas as garantías", conclúe o comunicado.
Relacionadas:
-
Poio reabre progresivamente os parques infantís
Por Redacción |
-
O Grove reabre os parques infantís tras comezar co programa de desinfección
Por Redacción |
-
Moraña e Portas aclaran que abrirán os parques infantís "no prazo máis breve posible"
Por Redacción |
-
Moraña mantén pechados os parques e retomará a feira quincenal de Santa Lucía
Por Redacción |
-
Cuntis asegura que cumprir as medidas para reabrir os parques é "inviable cos actuais medios e recursos"
Por Redacción |
-
Apertura de parques infantís e aforos ao 75%, así será a entrada na 'nova normalidade' a partir do luns
Por Redacción |