Reforzan a presencia policial para "garantir o dereito ao traballo" pola folga do transporte
Por Manu Otero
O delegado do Goberno en Galicia, José Miñones, trasladou hoxe ás empresas galegas que a Delegación do Goberno traballa para garantir o dereito daqueles que opten por traballar durante as xornadas que dure o paro convocado por unha parte minoritaria do sector do transporte por estrada.
Explicou que a Delegación do Gobierno coordina desde o pasado luns un dispositivo que mobiliza a 2.000 axentes de Policía Nacional e de Garda Civil nas catro provincias galegas co obxectivo de garantir o dereito ao traballo e á actividade.
Despois dun acto celebrado esta mañá en Vigo, Miñones advertiu que o Goberno “non pode tolerar os actos violentos e as coaccións contra os transportistas” e que traballa para dar todas as garantías para o transporte de servizos esenciais nas estradas de Galicia. Así, desde o luns, as forzas de seguridade xa realizaron 400 acompañamentos a transportes ata a mañá de hoxe e están en contacto permanente coas empresas que queren traballar “e que son a maioría”, indicou.
O representante do Goberno lembrou que este paro foi convocado por unha plataforma minoritaria do sector, que non forma parte do Comité Nacional de Transporte por Estrada. É este órgano, que representa a mais do 90% das empresas do transporte en España, o foro para negociar estas demandas e no que onte compareceu a ministra de Transportes, Mobilidade e Axenda Urbana. “Precisamente, o propio Comité manifestouse en contra desta protesta”, insistiu.
Para aminorar o impacto do paro e a acción dos piquetes informativos, o Goberno reforzou a presenza policial en zonas como os portos, os accesos aos polígonos industriais ou as vías de comunicación principais. Ademáis, manteñen o contacto permanente e constante co empresariado e coas persoas afectadas con diferentes solucións pensadas para cada caso.
Con todo, os efectos da folga son cada vez máis notorios e graves. A industria láctea española anunciou este mércores a inminente suspensión da actividade trasformadora do leite. Alegan que as fábricas viron interrompido a subministración das materias primas necesarias para a elaboración dos seus produtos e para o traslado dos mesmos ás cadeas de distribución, Por iso comunican a suspensión da recollida do leite nas explotacións gandeiras a partir deste xoves, informan a través dun comunicado desde a Federación Nacional de Industrias Lácteas nun comunicado.
Tamén outros colectivos encargados do abastecemento de alimentos, como a pesca fresca, comunicaron recentemente a súa preocupación polas dificultades para descargar e trasladar o peixe. Por iso xa pediron amparo ao Goberno para que escolte aos camións que trasladan as capturas frescas aos principais mercados almacenistas do país.
No ámbito local, o mercado de abastos de Pontevedra continúa funcionando con normalidade. Con todo, este xoves algúns postos permaneceron pechados polas complicacións á hora de recibir produtos de fóra da costa das Rías Baixas. Con todo, tranquilizan os vendedores, a actividade nas prazas continuará "porque hai peixe".
Relacionadas:
-
Portos e polígonos centrarán a atención policial para garantir a actividade dos transportistas durante a folga
Por Redacción |
-
O CSIF ameaza con sacar aos funcionarios á rúa se o Goberno mete man nos seus salarios ou condicións laborais
Por Manu Otero |
-
O sector da alimentación capea, por agora, o desabastecemento pola folga do transporte
Por Manu Otero & Mónica Patxot |
-
Identificado un membro dun 'piquete' do paro do transporte que lanzou pedras a un camión na AP-9
Por Natalia Puga |
-
A frota pesqueira da ría únese á folga polo elevado prezo do combustible
Por Manu Otero |
-
A tensión recrúase na zona cero da folga do transporte en Pontevedra con novos ataques a camións
Por Manu Otero |
-
A milla de ouro pontevedresa xa padece os efectos da folga do transporte
Por Manu Otero |
-
Escaso seguimento e mínimos incidentes en Pontevedra no segundo día de folga do transporte
Por Manu Otero |
-
Compras masivas ante o anuncio da folga do transporte
Por Redacción |