Que calquera actuación destinada a humanizar o barrio de Monte Porreiro conte con consenso veciñal. É o que reclama o PSOE aos seus socios de goberno, cos que non coinciden na forma na que se presentou a reforma prevista na zona.

Tras a reunión que mantiveron os edís socialistas este luns cos veciños, Tino Fernández sinalou que "non estamos en contra do proxecto en si", senón que entenden que "tal e como está" non debe ser abordado.

O tenente de alcalde insiste en que o edil responsable desta actuación, Demetrio Gómez, "ten que sentarse a falar cos veciños" e non seguir adiante co proxecto ata alcanzar un consenso cos residentes do barrio.

Abordar a reforma sen consenso, aseguran os socialistas, "pode xerar un conflito social", polo que reiteran que o proxecto "non o apoiamos así como está" e se debe buscar outra "solución técnica" que estea acordada cos veciños.

O PSOE defende "definir" os aspectos do proxecto, especialmente a peonalización da rúa Alemaña, que é a que xera un maior rexeitamento no barrio. Os socialistas insisten en que "non vemos mal" este aspecto, pero sempre que se "dialogue" cos veciños.

Os veciños, aseguran desde o grupo municipal socialista, apostan por priorizar a humanización do barrio "noutros aspectos", polo que subliñan que se fai necesario abrir un periodo de diálogo para darlle un novo enfoque ao proxecto.