Repunte de afectados por coronavirus na área sanitaria, con 32 novos casos activos para un total de 425
Por Diego Espiño
Despois de dúas xornadas de incremento moderado de pacientes afectados de coronavirus na área sanitaria de Pontevedra e O Salnés (16 o mércores e 11 o xoves), as cifras oficiais ofrecidas pola Consellería de Sanidade este venres 3 de abril ofrecen un repunte nos datos locais, con 32 casos activos máis nas últimas 24 horas para facer un total de 425.
Ante esta situación medra lixeiramente a cifra de hospitalizados en planta, con 95 casos (13 no Hospital do Salnés), mentres que os ingresados na Unidade de Coidados Intensivos seguen sendo 19. O resto de diagnosticados, 311, permanecen nos seus domicilios.
Por outra banda nas últimas 24 horas non se produciron defuncións asociadas ao Covid-19 na área sanitaria pontevedresa, mantendo en nove a cifra de falecidos desde o inicio da crise.
En canto ás altas hospitalarias, son xa 39 os pacientes que conseguiron superar a enfermidade tras un incremento de 7 persoas nas últimas horas.
A nivel autonómico modérase o incremento de casos rexistrados, xa que segundo informa a Dirección Xeral de Saúde Pública da Consellería de Sanidade, na última actualización, o número de afectados por coronavirus en Galicia ascende a 4.635 (+256). Deles 990 son da área da Coruña, 533 da de Lugo, 694 da de Ourense, 1.049 da área de Vigo, 675 da de Santiago, e 269 da de Ferrol.
Do total de pacientes positivos, 176 permanecen en UCI, 870 están en unidades de hospitalización e 3.589 no domicilio. Por agora, en Galicia rexistráronse 435 altas de pacientes e 149 falecementos.
O número de PCR realizadas é de 23.324.
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
O Sergas ten ao dispor da cidadanía unha páxina web (https://coronavirus.sergas.es), na que se pode consultar información dirixida á poboación, aos profesionais sanitarios e a outros colectivos.