Campaña de petición da Prisión Permanente Revisable

Juan Carlos Quer asume a xestión en Change da petición para negar a derrogación da Prisión Permanente Revisable

Por Redacción
Venres 19 de Xaneiro, 2018 ás 11:19 do Venres 19 de Xaneiro, 2018

A petición a través da plataforma Change iniciada por Rocío Viéitez, a nai das dúas nenas asasinadas polo seu pai David Oubel en Moraña foi asumida por Juan Carlos Quer, o pai de Diana Quer, recollendo o apoio tamén dos familiares de Marta do Castelo, de Mariluz Cortés e Ruth e José Bretón.

O pai de Diana Quer sinala que se trata de evitar que se derrogue a prisión permanente revisable, unha pena excepcional contemplada para casos de extrema gravidade, como é o caso do asasinato de menores.

As cinco familias nesta petición desmárcanse de ideoloxías políticas e sinalan que se uniron para afrontar unha gran loita coa esperanza de evitar que se vulneren os dereitos máis elementais do ser humano e que outras familias "tengan que vivir nuestro calvario".

Lembran que coa entrada en vigor da prisión permanente revisable, a situación do preso pódese revisar a partir dos 25 anos do cumprimento da condena e reinsertarse no caso de que cumpra con todo o procedemento para rehabilitarse. Na petición aclaran que con esta pena non se renuncia á reinserción do condenado.

Os familiares destas vítimas piden que se asine esta petición para trasladar todos os apoios ao Congreso dos Deputados e evitar que os representantes políticos derroguen a Prisión Permanente Revisable.

Polo momento levan máis de 431.400 sinaturas e o obxectivo é obter 500.000 apoios.