Os sindicatos sanitarios chaman os cidadáns a participar na manifestación do 26 de marzo
Por Redacción
Os sindicatos CESM-Omega, CSIF, CIG, SAE, UGT e CC.OO. convocan unha manifestación en contra da privatización e dos recortes en sanidade para o mércores 26 de marzo ás 20.00 horas, que se suma ás que tamén se organizan nas principais cidades galegas nesa xornada.
Segundo Carmen Revenga, do sindicato CEM-Omega, é necesaria a participación cidadá neste proceso porque a poboación se encontra afectada por "los recortes, prepagos, privatizaciones y despidos" que, segundo denuncia, se están a producir na Sanidade pública. Revenga indicou que ante este proceso de privatización, as empresas buscan o seu beneficio e "no va a revertir en la salud del paciente".
Os representantes sindicais indicaron que o decreto da xestión clínica aprobado polo consello de Goberno da Xunta de Galicia este xoves 20 é un paso máis na privatización de servizos. Neste sentido indican que o SERGAS estaba a analizar os xefes de servizo que estarían dispostos a aceptar esta fórmula de xestión e sinalaron que está a estudar a súa aplicación dentro da área de Pontevedra nos servizos de Farmacia, Psiquiatría e Dixestivo, mentres que en Primaria, segundo os sindicatos, se contempla o Ambulatorio de San Roque en Vilagarcía.
Sofía Barral do CSIF recoñece que o público "no puede ser una caja sin fondo, pero el Sergas tendría que gestionar de manera racionalizada" e por ese motivo opóñense a que se desmantele unha sanidade pioneira no mundo.
Durante o luns e o martes, estas organizacións sindicais instalarán na Praza da Peregrina unhas mesas informativas para facer un chamamento aos cidadáns para que participen nesta manifestación do martes 26.
Varios dos sindicatos que convocan esta marcha anunciaron que tamén asistirán á concentración con candeas que se realizará este vernes 21 ás 20.00 horas diante do Hospital Provincial.
Relacionadas:
-
Pontevedra volve saír á rúa para reclamar unha Sanidade pública de calidade
Por Redacción |
-
Protesta á luz das candeas
Por Oskar Viéitez |
-
Unha vela por unha Sanidade "pública, universal e gratuita"
Por Redacción |
-
A CIG detecta preocupación entre os pacientes pola situación sanitaria en Pontevedra
Por Redacción |
-
Sanidade califica de "satisfactoria" a reordenación sanitaria e lamenta o "debate ficticio" que xenera
Por Redacción |