O Ravachol, un ano máis na elite do bádminton nacional: derrota ao Ibiza pola permanencia
Por Alejandro Espiño
Obxectivo cumprido. E con fartura. O Ravachol Pontevedra continuará un ano máis na elite do bádminton nacional. Farao tras derrotar de maneira contundente ao Ibiza no playoff pola permanencia que se disputou en terras baleares.
O conxunto pontevedrés despregou un dos seus mellores partidos da tempada e impúxose por un claro 1-6, a pesar de ter o factor cancha en contra.
O primeiro punto do encontro caeu ao lado do Ravachol tras a gran actuación da parella formada por Javier Sánchez e Lucía Iglesias, que gañaron por un triplo 8-11 aos seus rivais, Vicent Martínez e Paula López.
Ania Setién e Lucía Rodríguez impuxéronse tamén no dobre feminino, no que competiron contra Laia Oset e Paula López. Foi tamén en tres sets: 5-11, 9-11 e 8-11.
Algo máis custou colocar o 0-3 no marcador global. O dobre masculino, que disputaron Manuel Brea e Javier Sánchez, tivo un óso duro de roer en Marc Cardona e Vicent Martínez.
O encontro chegou ata os cinco sets. O Eivissa colocouse 2-1 tras gañar 11-7 e 11-5 dous dos parciais e ceder o terceiro por un axustado 10-11. Pero os pontevedreses lograron remontar e con senllos triunfos por 9-11 deron a volta ao marcador.
O punto definitivo para a permanencia logrouno Georgina Bland, que derrotou claramente a Paula Llavero por 5-11, 6-11 e 4-11, colocando o 0-4 no electrónico, o resultado que selaba a permanencia do Ravachol na máxima categoría.
Aínda así, os pontevedreses non baixaron os brazos e lograron dúas vitorias parciais máis, as de Jacobo Fernández sobre Carlos Iglesias (11-5, 5-11, 10-11 e 6-11) e de Ania Setién sobre Lalia Oset (5-11, 4-11 e 2-11).
O punto de honra para o Eivissa chegou xa en plena celebración da escuadra galega, no último partido que enfrontou a Manuel Brea e Marc Cardona, que caeu ao lado local en cinco sets, 11-9, 11-6, 9-11, 5-11 e 11-7.
Relacionadas:
-
Ana Carbón renova o seu compromiso co Bádminton Ravachol
Por Redacción |
-
O Bádminton Ravachol perde a Ania Setién e renova aos irmáns Gabriel e Jacobo Fernández
Por Redacción |
-
Renovación de "unha peza clave no equipo" do Bádminton Ravachol, a británica Georgina Bland
Por Redacción |
-
Manuel Brea, primeira pedra do novo proxecto do Bádminton Ravachol
Por Redacción |
-
O Bádminton Ravachol xogarase en Eivissa a súa permanencia na máxima categoría
Por Redacción |
-
O Bádminton Ravachol brilla no Campionato Galego Absoluto
Por Redacción |