O Arosa métese na "pomada", valioso empate do Céltiga e derrotas de Ribadumia e Villalonga
Por Redacción
Aproveitou o Arosa as picadas de Cerceda, Rápido de Bouzas e Racing Villalbés para meterse na "pomada", entrar nos postos de play-off e mesmo poñerse a tiro da segunda praza. A irregularidade dos seus tres máximos rivais, provocou que, xunto co Deportivo B, cada xornada máis firme, os de Jorge Otero volvan presentarse como serios candidatos a loitar polo ascenso.
O conxunto arlequinado non deixou pasar a oportunidade de sumar os tres puntos na súa visita a O Poboado, fronte a un As Pontes case desafiuzado e que sumou a súa cuarta derrota consecutiva. Sidibé, aos 27 minutos, abría o camiño do triunfo arosista, que sentenciaría Fran Matos, ao transformar un penalti na segunda parte.
Consulta aquí o acta do partido As Pontes-Arosa.
Sumou o Céltiga un valioso punto na visita ao Salvador Otero dun dos aspirantes ao ascenso como o Rápido de Bouzas. Os branquivermellos seguen en postos de perigo, dada a igualdade que hai na zona baixa, especialmente pola posibilidade de arrastres por descensos de equipos galegos de segunda B, pero suman a súa terceira xornada consecutiva puntuando, o que lles permite mirar o futuro con relativo optimismo.
Foi un partido moi trabado, con escasas ocasións de gol e xusta repartición de puntos, cun Bouzas necesitado, pero que demostrou non atravesar o seu mellor momento de xogo.
Consulta aquí o acta do partido Céltiga-Rápido de Bouzas.
Sete xornadas despois volveu perder o Ribadumia. Fíxoo fronte a un Choco necesitado e en liña ascendente, o que aperta aínda máis a clasificación nesa apaixonante loita pola permanencia.
Os de Redondela saíron dispostos a aliviar a súa delicada situación e conseguírono nun partido que dominaron, sentenciando cun gol en cada tempo. o primeiro chegaba moi pronto, aos 10 minutos de xogo, por medio de Óscar Pérez.
O gol deu máis tranquilidade a un Choco que manexou o partido sen problemas ata que a falta de 13 minutos Marquitos sentenciaba o resultado a favor do equipo que adestra Marcos Montes.
Consulta aquí o acta do partido Ribadumia-Choco.
Cuarta derrota consecutiva do Villalonga, que segue pelexado co gol,. Nesta ocasión, os de Antonio caeron fronte a un rival directo pola permanencia como o Alondras, na súa visita ao campo do Morrazo.
Un solitario gol de Óscar Fondevila, xusto antes do descanso, deu a vitoria ao equipo branquivermello, que desde a chega de Nacho ao banco suma o seu terceiro triunfo consecutivo e supera ao mesmo Villalonga na clasificación.
Relacionadas:
-
Salva a cara o Villalonga nunha xornada negra para Arosa, Ribadumia e Céltiga
Por Redacción |
-
Duro revés para Arosa e Ribadumia, respiran Villalonga, gañando nas Pontes, e Céltiga, que frea ao Cerceda
Por Redacción |
-
Cómodo triunfo do Arosa, golea o Villalonga, gaña o Céltiga unha final en Redondela e cae o Ribadumia
Por Redacción |
-
De penalti gaña o Céltiga ao Villalonga, Ribadumia puntúa en Bouzas e o Arosa gaña no último minuto
Por Redacción |
-
Fran Fandiño decide para o Ribadumia ante a falta de puntería do Villalonga (1-0)
Por Ramiro Espiño & Diego Torrado |
-
Tropeza o Arosa que perde a Monroy con fractura de clavícula e o Céltiga aproveita a visita do pechacancelas
Por Redacción |
-
O Arosa supera ao Céltiga, triunfo dun bo Ribadumia e derrota na casa do Villalonga
Por Redacción |