A xustiza suspende de xeito cautelar as obras do parque eólico de Monte Acibal
Por Redacción
As obras de construción do parque eólico de Monte Acibal deberán ser paralizadas. Así o ditaminou o Tribunal Superior de Xustiza de Galicia (TSXG), que ordenou a suspensión cautelar destes traballos a pedimento da asociación Ecoloxistas en Acción.
O tribunal suspende así a execución da resolución da Xunta que lle outorgou á empresa Norvento a autorización administrativa previa e a de construción das instalacións, á vez que declarou a súa utilidade pública e a súa compatibilidade con diversos aproveitamentos forestais.
As actuacións previstas neste parque, situado entre Barro, Campo Lameiro e Moraña, afectan a hábitats de interese comunitario, a especies catalogadas e diversos petróglifos, polo que o TSXG paraliza as obras ata analizar os recursos presentados.
Os maxistrados da sección terceira da Sala do Contencioso-Administrativo sosteñen que, aínda que xa se executou o vial de acceso e o principal, así como os ramais de acceso a dous aeroxeradores e algunhas plataformas, "non está acreditada a finalización de todas as obras".
Estes traballos, segundo o cronograma, deberían estar terminados en novembro, polo que o tribunal entende que "aínda se poden producir afectacións ao medio ambiente e ao patrimonio que poderían ser irreparables", sen esquecer as que xere a posta en funcionamento do parque.
Con esta decisión, o TSXG quere asegurar que a futura sentenza que determine a afectación deste proxecto sobre o territorio ou o grao de protección, corrección ou compensación que se poida rexistrar "póidase levar á práctica de modo útil".
Ademais, o alto tribunal galego subliña que esta suspensión ampárase no feito de que a resolución que autorizou a execución do parque eólico é "análoga" á que deu lugar á autorización dun parque anulado por sentenzas do TSXG, emitidas en xaneiro de 2022.
Entre outras cuestións, a resolución xudicial tamén advirte que, aínda que se deben ponderar todos os intereses que se contrapoñen nesta cuestión, prevalecen os que defenden a asociación ecoloxista e os veciños afectados polas expropiacións para executar o parque.
Así, a "mera posibilidade" de que se produza un dano "irreparable ou de moi difícil ou incerta reparación" sobre zonas protexidas, argumenta o tribunal, sostén a suspensión da execución da actividade que pode producir ese risco.
"É prevalecente o interese xeral en manter indemnes eses espazos públicos sobre o particular que ten a promotora do parque eólico Acibal en executar de forma inmediata o proxecto autorizado, por moi lexítimo que sexa o seu dereito", engade o TSXG.
O tribunal advirte, con todo, advirte que iso "non significa, de ningún xeito, que se aplique a suspensión de forma automática", como proba que se denegou noutros casos.
O auto, que non é firme, pois contra el cabe presentar recurso de reposición, está asinado por cinco maxistrados e conta cun voto particular dunha das maxistradas, quen entende que "non procedía o outorgamento da medida, senón a suspensión da decisión mentres non se ditase resolución no incidente de inadmisión".
Relacionadas:
-
ADEGA presenta a demanda ante o TSXG pidindo a paralización inmediata das obras do parque eólico Acibal
Por Anxo Lourido |
-
Expoñen un vídeo para denunciar o uso non autorizado de maquinaria pesada nos arredores de petróglifos do Monte Acibal
Por Anxo Lourido |
-
'Salvemos o Acibal' analizou os desafíos dos montes galegos ante a irrupción dos parques eólicos
Por Mónica Patxot & Redacción |
-
Programada para este xoves 11 unha xornada activista en defensa do monte Acibal
Por Anxo Lourido |
-
Tensión en Barro polo paso sen autorización de transporte especial con material destinado ao parque eólico do Monte Acibal
Por Anxo Lourido |
-
Presentan o Manifesto Acibal "contra o espolio dos nosos montes e os seus bens"
Por Oskar Viéitez |
-
Renovado o interior do Centro de Interpretación do Petróglifos de Mogor
Por Redacción |
-
"Indignación" por un novo impacto dos proxectos eólicos no Monte Acibal, a desaparición da Pisada do Mouro
Por Redacción |
-
Amil Sen Eólicos denuncia o inicio de voaduras no Monte Acibal sen a revisión de Patrimonio e Augas de Galicia
Por Redacción |
-
Detectan petróglifos danados pola acción da maquinaria de construción do parque eólico do monte Acibal
Por Redacción |