Os arquitectos galegos censuran a decisión de anular o proceso para rehabilitar Santa Clara
Por Redacción
Para o Colexio de Arquitectos de Galicia os concursos de ideas son a "forma máis acaída" para afrontar calquera intervención arquitectónica. De aí que manifeste a súa "discrepancia" coa decisión da Deputación de anular o proceso de reforma do convento de Santa Clara.
"O traballo dos estudios de arquitectura, como o de calquera profesional, pode gustar máis ou menos, pero ningún estudio presentaría nunca unha proposta que non respecte o entorno arqueolóxico, histórico ou patrimonial sobre o que actúa", subliñan desde o colexio.
A entidade lamenta as "desafortunadas" declaracións de Rafa Domínguez, porque "poñen en cuestión o bo facer e o bo nome dos que participaron no concurso e dos membros dun xurado diverso, competente e que só buscou o mellor para o monumento e o conxunto da cidade".
No caso de Santa Clara, segundo o colexio galego de arquitectos, o xurado "tivo a fortuna de contar con magníficas propostas", que amosaron ao seu xuízo "gran capacidade, talento e estudo desde unha enorme diversidade de ángulos de todos os condicionantes".
Foron propostas moi distintas que presentaron diferentes opcións de intervención nun complexo desta magnitude, "recollendo o desafío de transformar este recinto de vocación introspectiva nun lugar público", apuntan desde este organismo.
O colexio defende que as propostas fixeron, igualmente, unha "lectura crítica" das condicións do concurso, presentando matices e opcións e puideron ser valoradas no propio convento, xa que o xurado tivo o privilexio de vivir tres días no recinto, visualizando as propostas en detalle.
"Isto permitiu unha valoración cunha profundidade e reflexión pouco comúns”, tal como advirte o colexio profesional, que considera necesario destacar a diversidade de axentes, o momento e as competencias de cada un en canto ao uso do patrimonio público.
O "gran valor" dos concursos de ideas como o de Santa Clara "é dispór de proxectos de primeiro nivel e poder contrastalos, ademais de que achegaron luz en moitos aspectos", conclúe o COAG, que lamenta que a paralización do proxecto sexa por "discrepancias" co proxecto gañador.
Relacionadas:
-
Rafa Domínguez agarda que en 2027 estea finalizada a reforma de Santa Clara
Por Mónica Patxot & Anxo Lourido |
-
O Goberno provincial percorre o convento de Santa Clara da man da directora do Museo
Por Oskar Viéitez & Mónica Patxot |
-
Lores confía en que o presidente da Deputación manteña os compromisos adquiridos respecto ao futuro de Santa Clara
Por Mónica Patxot & Anxo Lourido |
-
Mosquera acusa a Domínguez de "desfacer todo o feito" e actuar de "destroyer" co Museo e Santa Clara
Por Alejandro Espiño |
-
A Deputación descarta os proxectos para Santa Clara para evitar unha "catástrofe sin igual" coa "vandalización" dos xardíns
Por Oskar Viéitez & Mónica Patxot |