Ravachol arde para poñer fin ao Entroido 2023 en Pontevedra
Por Cristina Saiz & Anxo Lourido
María Simal, voceira da Irmandade de Ravachol, anunciaba o tráxico final do loro Ravachol na xornada deste sábado, ante milleiros de persoas que asistiron de rigoroso loito ao sepelio, con estas palabras:
"Benvida xentiña que aquí vos achegastes para amosarlle os vosos respectos ao malpocado Ravachol, que vén de espichala por mor da desfeita da sanidade pública.
Coitado, o noso benquerido bechiño, mártir do desprezo gobernamental coa saúde de todos nós!
Xa o luns non tiña pinta de estares moi aquelado, o malfadado.
Polo si ou polo non, levámolo canda o PAC para que lle botasen un ollo clínico.
Pero nin ollo nin clínico: de persoal sanitario, alí non había ninguén.
Ai, meu Ravacholiño, que cucaches por culpa da mesquindade suíña de quen dilapidan os nosos cartos públicos en beneficios privados.
Ai, meu Ravacholiño, a ver se o vindeiro ano volves canda nós con boa saúde, e nós podemos recibirte cunha sanidade pública pimpante e baril.
Viva a sanidade pública universal, gratuíta e de calidade!
Viva o entroido! Viva Pontevedra! Viva Ravachol!"
O loro máis coñecido do Entroido pontevedrés falecía nun PAC de maneira pouco sorprendente e era velado desde as 18.00 horas na sala mortuoria instalada na praza da Verdura.
Ás 21.00 horas, o cortexo fúnebre acompañaba ao difunto Ravachol polas rúas San Román, Ferrería, paseo de Antonio Odriozola, Soportais, Manuel Quiroga, Princesa, Sabela II, Rúa Real, Sarmiento, Pasantería, para finalizar na praza da Ferrería onde se realizou o último adeus coa compaña das comparsas Os Solfamidas, Las Flores de Carnaval, Os 100 Tolos e Vamos a Todo.
O papagaio de Perfecto Feijoo era incinerado en medio dun espectáculo necrolóxico coa sempre tétrica danza da morte a cargo da agrupación Celme. Val do Lérez tamén interpretou unha saeta en memoria do finado.
Os Canecos, Os Miúdos, As Sonecas e Os da Caña percorreron á cidade ao longo da noite chorando a súa perda e despedindo o Entroido 2023 en Pontevedra.
Relacionadas:
-
Podería ser recoñecido Ravachol nas Letras Galegas? A clave está en Enrique Labarta
Por María José Pita & Mónica Patxot |
-
Vilanova de Arousa celebrou a súa Festa do Momo coa Moma Shakira
Por Redacción |
-
A Mostra da Parodia recolle con retranca a compra de Santa Clara, as galas no rural ou as partidas de petanca
Por Mónica Patxot & Redacción |
-
Os do Val do Lérez gañan o concurso de murgas
Por Mónica Patxot & Oskar Viéitez |
-
Piratas a babor e estribor na noite máis divertida e bandida
Por Mónica Patxot & Anxo Lourido |
-
Ravachol preséntase no 2023 como paciente dun PAC da área sanitaria e morrerá sen que o vexa un médico
Por Mónica Patxot & Anxo Lourido |
-
Un multitudinario desfile de Entroido enche as rúas de Pontevedra de música, cor, fantasía e retranca
Por Alejandro Espiño & Cristina Saiz |