Guerra política aberta arredor da situación sanitaria na área de Pontevedra
Por Anxo Lourido
Julio García Comesaña, conselleiro de Sanidade, moveu peza nas últimas horas. Enviou misivas aos alcaldes do distrito sanitario de Pontevedra para convocalos a unha reunión na que tamén estarán presentes o xerente da área, José Flores, e o delegado territorial da Xunta en Pontevedra, Luís López, ademais do propio conselleiro. A cita será o xoves 26 de xaneiro ás 17.00 horas no edificio da Delegación territorial da Xunta en Pontevedra.
Na carta remitida aos alcaldes, García Comesaña quere trasladar un balance do traballo realizado durante o últimos seis meses e das "melloras acadadas, sempre dentro da difícil situación que está a vivir a atención primaria en toda España polo déficit de persoal especialista en medicina familia e comunitaria que se sofre en todo o Estado".
FRONTE COMÚN DE LORES
A convocatoria preséntase como unha resposta á cita que este mércores 18 ten lugar no Concello de Pontevedra. O alcalde Miguel Anxo Fernández Lores enviou cartas tamén a todos os máximos representantes municipais de Barro, Bueu, Caldas, Campo Lameiro, Cerdedo-Cotobade, Cuntis, Forcarei, O Grove, A Lama, Marín, Meaño, Meis, Moraña, Poio, Ponte Caldelas, Pontevedra, Portas, Sanxenxo, Soutomaior e Vilaboa.
A intención de Fernández Lores é crear unha fronte común para demandar solucións para que se resolva a actual situación sanitaria debido á "deterioración continuada e sen percepción de parada" que se experimenta nos centros de saúde e hospitais públicos.
RESPOSTA DE DIRIXENTES POPULARES
Esta invitación xa foi respondida por algúns alcaldes como Telmo Martín, rexedor de Sanxenxo, con outra carta na que criticaba a Lores que "publicitara a reunión nos medios de comunicación" antes de manter un "mínimo contacto directo" sobre ese encontro. Lembra que esta semana moitos dos alcaldes acudirán a Fitur.
Telmo Martín a Fernández Lores: "a iniciativa non é de boa fe"
Martín escusa a súa ausencia alegando que a "iniciativa non é de boa fe e sospeito que, en lugar de solucións, buscas converter a situación sanitaria nunha nova fronte ou chibo expiatorio". O alcalde de Sanxenxo recoñece os graves problemas sanitarios que padecen os concellos "situación que me preocupa moito e que non vou ocultar. Por iso, esixo á Consellería de Sanidade solucións a curto e medio prazo. Algunhas delas xa se están producindo na nosa área sanitaria".
Conclúe o escrito convidando a Lores a que denuncie a negativa do goberno español a incrementar as prazas de MIR de médicos de familia e pediatras, orixe do problema, segundo Telmo Martín.
Este mesmo mércores, a alcaldesa de Marín, María Ramallo, e o presidente local do PP en Pontevedra, Rafa Domínguez, convocaron aos medios de comunicación para avaliar a convocatoria realizada por Fernández Lores.
Tamén nesta mesma xornada, o propio conselleiro Julio García Comesaña acudirá ao Hospital Provincial a un acto de acreditación da Sociedade Española de Neuroloxía para a Unidade clínica de trastornos do movemento desta área sanitaria.
REUNIÓN DE REPRESENTANTES MUNICIPAIS SOCIALISTAS
Ao mesmo tempo, alcaldes, tenentes de alcaldes e portavoces socialistas mantiñan un encontro co secretario xeral provincial David Regades nas últimas horas para esixir ao presidente da Xunta de Galicia, Alfonso Rueda, que "quite xa o casco, que deixe de vendernos a moto e que se poña dunha vez aos mandos" da sanidade pública na comunidade.
Afirman que a Xunta segue deixando prazas MIR sen cubrir en especialidades crave tras a pandemia e poñen como exemplo Pneumoloxía e Saúde Mental. Os representantes municipais socialistas afirman que "non queremos máis cambios de caras na Xerencia, queremos un cambio profundo e inmediato nas políticas públicas".
Alertan do colapso sanitario que se sofre no distrito de Pontevedra e acordaron convidar publicamente á cidadanía para partir na manifestación prevista o 12 de febreiro en Santiago de Compostela, convocada pola plataforma SOS Sanidade Pública.
Lamentan tamén que a única resposta de García Comesaña sexa culpar o Estado e o Ministerio de Sanidade de non convar máis prazas MIR cando a convocatoria deste ano foi a máis numerosa da historia cun total de 725 prazas en Galicia, expoñen tras este encontro.
Relacionadas:
-
Rebelión en Cuntis pola "nefasta" situación sanitaria: sen médico estes días e sen cita ata o 10 de xaneiro
Por Natalia Puga |
-
Nova xornada sen médicos no centro de saúde de Cuntis
Por Redacción |
-
Denuncian que en Sanxenxo van derivar pacientes pediátricos a médicos de adultos sen preparación específica
Por Redacción |
-
"Os veciños protestamos pola situación sanitaria. Non somos políticos"
Por Oskar Viéitez |
-
Activan unha campaña informativa en Defensa da Sanidade Pública
Por Redacción |
-
Moraña sae á rúa para esixir que se cubran as vacantes no centro de saúde
Por Redacción |
-
Rueda non asistirá á reunión cos alcaldes e considera que o seu manifesto sanitario é "puramente político"
Por Oskar Viéitez |
-
García Comesaña, sobre as demandas sanitarias dos alcaldes: "É un tema partidista, meramente político"
Por Mónica Patxot & Anxo Lourido |
-
Unha fronte de alcaldes pide que Rueda asista á reunión para tratar a situación sanitaria do distrito de Pontevedra
Por Mónica Patxot & Anxo Lourido |
-
Aseguran que os servizos sanitarios que presta o Concello "son os que están peor atendidos"
Por Oskar Viéitez & Mónica Patxot |
-
María Ramallo, sobre a convocatoria sanitaria de Lores: "É unha reunión máis de foto que de fondo"
Por Anxo Lourido |
-
Pontevedra impulsa un cumio de alcaldes polo "deterioro que non para" na atención sanitaria
Por Alejandro Espiño |
-
"Non hai médicos, volvémolo dicir", a explicación da Xerencia sobre a falta de facultativos nos PAC do distrito de Pontevedra
Por Natalia Puga |
-
Montecelo, colapsado por falta de médicos nos PAC, pide compresión aos pacientes: "a demora non é arbitraria"
Por Natalia Puga | Creada e actualizada