O PP rexeita os orzamentos "antiprovincia" da Deputación porque "deixan orfos aos concellos e aos veciños nun ano negro"
Por Oskar Viéitez
Creada e actualizada
Creada e actualizada
O grupo provincial do Partido Popular presentará una enmenda á totalidade dos orzamentos da Deputación de Pontevedra para o ano 2023 que cualifica de "anticoncellos" e "antiprovincia", porque "deixan orfos aos concellos e aos veciños nun ano negro".
Os deputados do grupo provincial do PP, Jorge Cubela, Pepa Pardo e Alfonso Marnotes compareceron este mércores en rolda de prensa para valorar as contas provinciais que, segundo dixeron, "amosan unha clara falta de compromiso" xa que "non están á altura" e son "nefastos" o que, para Cubela é una proba de que no Goberno provincial "teñen un nulo coñecemento da realidade, están totalmente afastados da provincia".
Os populares aseguraron que esperaban un documento máis ambicioso por ser o último orzamento do mandato.
Jorge Cubela lamentou o "nulo apoio aos concellos, aos colectivos e entidades da provincia" e sinalou que só hai "unha pedrea de 1 millón de euros para o Plan Concellos" mentras que as transferencias que se prevén nos orzamentos para os concellos "son incluso inferiores ao ano pasado".
Os deputados do PP tamén criticaron que o goberno provincial aumente o gasto corrente para a Deputación, "sen que se atenda o incremento deste gasto corrente para os concellos" e afirman que a presidenta Carmela Silva e o vicepresidente César Mosquera "seguen contando cunha importante partida para a súa promoción, autobombo e propaganda, 2 millóns de euros".
Ademáis Cubela asegurou que, ademáis do PP, tamén hai "unha base crítica de alcaldes socialistas da provincia que reclaman máis recursos para os concellos pequenos e medianos".
Por último, o PP reclaman á Deputación que constitúa un fondo financeiro extraordinario de anticipos reintegrables destinados aos concellos de menos de 50 mil habitantes; e se aprobe unha convocatoria de subvencións ás comunidades de auga da provincia.
O GOBERNO CONSIDERA "GROTESCA" A EMENDA DO PP
"Incrédulo" ante as críticas do PP cando, segundo defende, a Deputación de Pontevedra é líder en España en transferencias aos concellos. Así se mostrou este mércores o responsable de Economía e Facenda no goberno provincial, o deputado Carlos Font.
Para o socialista, a emenda á totalidade dos populares aos orzamentos de 2023 é "grotesca" e está composta de "catro folios a dobre espazo e corpo 16 repletos de erratas", cando debería ser un proxecto alternativo "serio e rigoroso".
Ademais Font cualificou como "moi reprochable" que o PP se permita dicir que o incremento anual do Plan Concellos, cun millón de euros adicional sobre o anterior, "é unha pedrea", cando os municipios en Ourense "pedirían o traslado a Pontevedra se puideran".
O deputado, que critica os "erros de vulto" dos cálculos feitos polos populares, subliña que se o financiamento local se resinte no actual contexto económico "deberían buscarse solucións na Xunta de Galicia", que vén de conxelar un ano máis o Fondo de Cooperación Local.
"Se algunha administración merece o epíteto de anticoncellos é a que conxela os fondos municipais regrados e berra día si e día tamén con aqueles concellos que non son da súa cor política", sentencia Carlos Font.
Relacionadas:
-
Carmela Silva insiste en negarse a presentar o orzamento no Parlamento "por unha cuestión de principios"
Por Anxo Lourido |
-
Aprobados os orzamentos da Deputación para 2023
Por Oskar Viéitez & Mónica Patxot |
-
Rexeitamento do PP ao orzamento da Deputación porque "para os concellos só destinan a pedrea"
Por Oskar Viéitez |
-
Carmela Silva presenta o último orzamento deste mandato na Deputación aínda que está segura de que presentará máis no futuro
Por Oskar Viéitez & Mónica Patxot |