Critican a BeOne por pedir una compensación ao Concello sen cumprir "cos incrementos salariais pactados"
Por Diego Espiño
O comité de empresa de Serviocio BeOne Campolongo, concesionaria que xestiona o complexo deportivo municipal, criticou este xoves a reivindicación da empresa ao pedir un reequilibrio económico ao Concello de Pontevedra xustificándose nunha caída de ingresos pola pandemia.
En concreto e para compensar estas perdas, provocadas polos meses que estivo pechado ou con aforamentos limitados, solicitan una indemnización de 418.550 euros en virtude dunha cláusula de reequilibrio económico á que teñen dereito. Sen acordo, o caso vai dirimirse nos tribunais.
Con todo esta situación non gustou á representación dos traballadores, quen a través do sindicato Comisións Obreiras criticaron a manobra cando "os traballadores e traballadoras non tiveron os incrementos salariais pactados en convenio", defenden.
A representación laboral entende que os empregados do complexo deportivo de Campolongo foron os grandes prexudicados durante a pandemia ao sufrir ERTES nos que o seu soldo se viu reducido ao 70% da súa base de cotización durante o estado de alarma "e posteriormente o 50% e consumindo prestación de desemprego", explica o sindicato.
Ademais defenden "que as empresas, e concretamente esta recibiron axudas de todo tipo por parte das administracións para reducir o impacto económico derivado da pandemia".
Por último, volvendo á actualización dos salarios, o comité de empresa asegura que "a empresa Serviocio BeOne non actualizou os salarios do seu persoal dos anos 2021 e 2022, incumprindo o convenio colectivo de instalacións deportivas e ximnasios de Galicia".
Relacionadas:
-
Autorizan a BeOne a que suba un 1,87% as tarifas aos usuarios do ximnasio e as piscinas de Campolongo
Por Oskar Viéitez |
-
O ximnasio de Campolongo avanza cara á autosuficiencia enerxética con 66 paneis solares novos
Por Redacción |
-
BeOne solicita subir un 2,5% as tarifas aos usuarios do ximnasio e as piscinas de Campolongo
Por Oskar Viéitez |
-
Placas solares no centro deportivo de Campolongo para reducir unha factura anual "que está por riba dos 120.000 euros"
Por Diego Espiño |
-
A concesionaria do centro deportivo de Campolongo leva o Concello ante os tribunais
Por Alejandro Espiño |
-
Miguel Ángel Silvestre ponse en forma en Campolongo
Por Redacción |
-
BeOne abre a porta para asumir a xestión da piscina olímpica de Pontemuiños
Por Manu Otero |