Pontevedra incrementou nun 24% os desprazamentos peonís e ciclistas na última década
Por Redacción
O Concello de Pontevedra continúa adiante coa análise dos datos que se desprenden do Plan de Mobilidade Urbana e Sostible (PMUS) que está a redactar o departamento que dirixe o concelleiro Demetrio Gómez.
Entre as últimas cifras analizadas destacan as relativas á mobilidade da cidade: peonil, ciclista, transporte público e privado. Revelan que en dez anos a mobilidade peonil e ciclista de Pontevedra incrementou un 24%, situándose no 90% mentres que a mobilidade do vehículo privado caeu á metade, un pouco por riba do 14%.
Os datos dos que se nutre o PMUS proceden do Plan de tráfico e mobilidade da cidade de Pontevedra elaborado pola empresa Pettra no ano 2011, e do Estudo de demanda de mobilidade na zona periurbana e proposta do transporte a demanda que se está a desenvolver no marco da posta en marcha do ‘Coche de Punto’ no Concello. Estes datos son do ano 2021.
O estudo de Pettra indicaba que o reparto modal de viaxes na cidade en 2011 seguía esta distribución: 66% dos desprazamentos facíanse a pé; 5% dos desprazamentos facíanse en bicicleta e en transporte público e 29% dos desprazamentos facíanse en vehículo privado.
En 2021, segundo o Estudo de demanda de mobilidade na zona periurbana e proposta transporte a demanda que están a desenvolver as empresas Mcrit e Seteoitavas, existe a seguinte distribución modal para as viaxes con orixe e destino dentro da cidade de Pontevedra: 84’3% dos desprazamentos son de mobilidade activa peonil ou ciclista; 1% dos desprazamentos son noutros medios de transporte que inclúen o transporte público e 14’7% dos desprazamentos son en vehículo privado.
O PMUS, logo de ponderar os datos, sitúa no 90% os desprazamentos de base peonil e ciclista xa que engade aqueles que fan as persoas que veñen de fóra da cidade, logo de estacionar os seus vehículos.
Á vista destes datos a Concellaría conclúe que "a mobilidade peonil en Pontevedra evoluiu positivamente acadando resultados aos que non se achega ningunha cidade do estado, froito da permanente aposta por unha cidade para as persoas e polo respecto ao medio ambiente".
Mostra diso é a comparativa con outras cidades do Estado como Madrid, Bilbao, Gasteiz ou Barcelona. Segundo os datos achegados pola Dirección Xeral de Tráfico (DXT) das principais cidades do Estado, a mobilidade peonil oscila entre o 27% da mobilidade peonil de Madrid e os 65% de Bilbao ou o 68% de Gasteiz. Todas elas moi lonxe do 90% de Pontevedra.
Estas cidades son maiores que Pontevedra, polo que teñen un uso maior do transporte público, pero tamén teñen un maior uso do vehículo privado con datos que só en Bilbao (12%) e Barcelona (15%) se achegan ao 10% de Pontevedra. Ao mesmo tempo teñen unha distribución modal da mobilidade que implica unhas máis emisións de gases de efecto invernadoiro ao sumar o transporte público e os vehículos privados.
Estes datos tamén revelan que Pontevedra cumpre os obxectivos das Zonas de Baixas Emisións e, polo tanto, non é preciso cobrar unha peaxe por circular ou aparcar, ou que se obrigue a veciñanza a cambiar de coche mentres se reduzan e controlen os tráficos innecesarios.
Relacionadas:
-
Retirar tráfico motorizado das beiras do Lérez, un dos obxectivos marcados no Plan de Mobilidade Urbana Sostible
Por Redacción |
-
Os taxistas de Vilagarcía formaranse en primeiros auxilios
Por Redacción |
-
Pontevedra insiste en limitar máis o tráfico como vía para cumprir a lei de cambio climático
Por Redacción |
-
Lores falará coa ministra de Mobilidade das futuras zonas de baixas emisións
Por Oskar Viéitez |
-
As novas normas de tráfico, ao detalle
Por Natalia Puga |
-
Pontevedra conta con 1.953 prazas en aparcamentos disuasorios e 4.220 de pago
Por Diego Espiño |
-
Pontevedra ten 109 vehículos eléctricos censados e conta con 21 puntos de recarga
Por Redacción |
-
A Xunta proxecta humanizar a estrada vella a Marín e catro aparcadoiros na contorna da capital
Por Oskar Viéitez & Mónica Patxot |
-
Toda a "cidade compacta" será zona de baixas emisións antes de 2023
Por Alejandro Espiño |