O programa 'O teu cole na historia, coñecendo a nosa contorna', desprazouse este venres ata o CEIP de Marcón, onde Polo Correo do Vento realizou unhas sesións divulgativas para explicar ao alumnado a historia do seu colexio e do contorno.

Kike Mauricio e Carlos Taboada (Polo Correo do Vento) e o músico Antón Ke, explicaron a un total de 40 alumnos de Educación Infantil e 25 de Primaria do CEIP Marcón as historias agochadas no mural que ten como protagonista o entroido tradicional da parroquia, hoxe desaparecido pero coa intención de recuperalo con iniciativas e estudos por parte da Sociedade Antropolóxica Galega.

Entre os elementos que conformaron a intervención artística de Polo Correo do Vento incluíronse, a un lado, a pedra zoomorfa de Outeiro Navío e ao outro, a pedrafita de Pena Longa, que acompañan a paisaxe da ría dende o alto do Monte da Fracha. Un falcón peregrino, os muíños de Pintos, a igrexa e os petróglifos de Outeiro Redondo completan a historia e valerosa contorna que cingue este colexio.

'O teu cole na historia, coñecendo a nosa contorna', é un programa impulsado pola Concellería de Educación co obxectivo de que o alumnado de Pontevedra coñeza un pouco mellor a historia dos seus colexios e o contorno no que se atopan e acaden unha maior identificación cos centros.