Os colexios Cabanas e Marcos da Portela reciben a visita de 'O teu cole na historia'
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/d30/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/624483375e-whatsapp-image-2022-03-30-at-4.05.26-pm-4-.jpeg)
© Concello de Pontevedra
![](/web/cache/scene/uploads/fotos/foto/aad/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6244835d0b-whatsapp-image-2022-03-30-at-4.06.41-pm-1-.jpeg)
© Concello de Pontevedra
![](/web/cache/scene/uploads/fotos/foto/8be/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/624483a1b7-whatsapp-image-2022-03-30-at-4.05.26-pm.jpeg)
© Concello de Pontevedra
![](/web/cache/scene/uploads/fotos/foto/172/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/624482e426-whatsapp-image-2022-03-30-at-4.06.41-pm.jpeg)
© Concello de Pontevedra
O proxecto 'O teu cole na historia, coñecendo a nosa contorna', impulsado pola Concellería de Educación co obxectivo de que o alumnado dos colexios de Pontevedra coñezan a historia dos seus centros, continúa a desenvolver os talleres divulgativos.
O equipo creativo de Polo Correo do Vento (Carlos Taboada e Kike Mauricio) e o músico Antón Ke achegáronse na mañá deste mércores ata o CEP Marcos da Portela (Monte Porreiro) para compartir relatos orais e música con 37 escolares de 2º de Primaria e 35 de 1º de Primaria. A xornada anterior, fixeron parada no CEIP Cabanas (Salcedo) para desenvolver unha sesión con 35 nenos e nenas de 2º de Primaria, 32 de 1º de Primaria e 25 de Infantil.
O tenente de alcalde e concelleiro de Educación, Tino Fernández, explicaba os diferentes motivos que se pintaron nos grandes murais instalados nestes colexios e sobre os que xiran as sesións didácticas.
MURAL NO CEP CABANAS
"As figuras centrais da intervención artística efectuada nos accesos ao CEIP Cabanas son a mestra e pedagoga Ernestina Otero e o enxeñeiro agrónomo, xenetista e veterinario Cruz Gallástegui", indicaba o concelleiro de Educación.
A parte superior do mural amosa unha vasta viaxe no tempo, ao representar a parte máis antiga da historia do colexio, coas cabanas prehistóricas, os petróglifos de Mato das Cruces, o Castro das Moas e os Muíños do Batán.
Na parte inferior ten lugar a historia máis recente da súa contorna, vencellada á Misión Biolóxica, que desde 1928 ten as súas instalacións no Pazo de Gandarón, en Salcedo.
Á esquerda do mural, Ernestina Otero leva de excursión ao seu alumnado, e á dereita, Cruz Gallástegui amósalles como se realiza a polinización do millo.
MURAL NO CEP MARCOS DA PORTELA
No caso do mural do CEP Marcos da Portela, o poeta do século XVIII natural de Monte Porreiro que lle dá nome ao centro educativo e que Sarmiento cita nas súas coplas é un dos principais protagonistas.
"Ademais da personaxe inmortalizada por Valentín Lamas Carvajal na primeira publicación en galego, bautizada co nome de O Tío Marcos d’a Portela, nesta intervención artística tamén aparece (na súa parte baixa) o propio Pai Sarmiento, escribindo sobre o poeta ao abeiro do Carballo de Santa Margarita, patrimonio natural da nosa cidade, e en presenza dunha vacaloura", sinala Tino Fernández.
Da outra beira, dende o Mirador de Monte Porreiro, divísase o tramo final do río Lérez e abaixo, á esquerda, aparece representada Josefa Iglesias Vilarelle, mestra de Mourente, autora do Método de Lectura en Galego, o primeiro do seu xénero, que foi publicado polo Seminario de Estudos Galegos en 1932.
Relacionadas:
-
Polo Correo do Vento presenta o libro 'O teu cole na historia' con motivo dos murais creados en 21 escolas
Por Mónica Patxot & Anxo Lourido |
-
A Misión Biolóxica participa nunha investigación para producir pan de millo de calidade máxima con fariñas galegas
Por Redacción |
-
'O teu cole na historia' visita o CEIP de Marcón
Por Redacción |
-
O colexio Marcos da Portela presume da súa historia e da mestra Josefa Iglesias Vilarelle e o Pai Sarmiento
Por Redacción |
-
Ernestina Otero e Cruz Gallástegui protagonizan o novo mural do CEIP Cabanas
Por Redacción |