O PP acusa á Deputación de ripar medio millón de euros a Cerdedo-Cotobade na repartición de fondos do Plan Concellos
Por Manu Otero
O Partido Popular reclama á Deputación de Pontevedra que manteña para Cerdedo-Cotobade as mesmas cantidades do Plan Concellos que viña percibindo e que, como concello fusionado e atendendo á Lei reguladora das bases de réxime local, correspondería ao que percibirían os dous concellos por separado.
O voceiro popular e alcalde do municipio afectado, Jorge Cubela, denuncia que a Deputación de Pontevedra decidiu cambiar as bases do plan e eliminar a singularidade de Cerdedo-Cotobade, unha decisión que supón a redución dos ingresos deste concello en 250.000 euros anuais, 500.000 euros entre 2022 e 2023. "É unha cifra moi importante e fundamental para o plan de emprego, para investimentos, para a mellora de servizos e a organización de actividades”, defende o rexedor.
Así o reclamarán no pleno ordinario deste venres, no que os populares defenderán unha moción para que o Goberno provincial reconsidere este posicionamento e aprobe unha modificación de crédito que complete a cantidade que lle correspondería ao concello resultante da fusión. Como exemplo, os populares refírense ao caso de Oza-Cesures, na provincia da Coruña, que a pesar de fusionarse antes, a Deputación da Coruña aínda lle recoñece a súa singularidade.
Cubela recorda que xa no 2017, Cerdedo-Cotobade tivo que enviar un escrito á Deputación de Pontevedra para denunciar que nas bases dese ano non se vía reflectida a cantidade que lle tocaría aos dous concellos por separado. “Desde o principio este Goberno amosou o seu rexeitamento á fusión de Cerdedo-Cotobado, pero o tempo demostrou que foi unha decisión boa e con importantes vantaxes para os veciños dos dous concellos. Pero tamén puxo en evidencia a falta de coherencia dos socialistas, que aquí buscan a confrontación permanente por riba dos intereses da cidadanía, mentres en Don Benito e Villanueva de la Serena promoveron a fusión”.
Por último, o popular di que “non se trata de pedir un trato preferente, senón de manter un investimento similar ao que recibirían os dous concellos por separado e así cumprir co espírito da Lei de racionalización e sostibilidade da administración local, que sinala que a fusión de concellos en ningún caso suporía unha diminución para os ingresos dos percibidos con carácter previo á fusión", resolveu