Luz verde á creación en Pontevedra das novas facultades de Deseño e de Dirección e Xestión Pública
Por Alejandro Espiño
Xa é oficial. Pontevedra reforzará a súa oferta académica para o próximo curso universitario. O Consello Galego de Universidades informou favorablemente á creación das facultades de Deseño (de novo impulso) e de Dirección e Xestión Pública, que se desliga de Ciencias Sociais.
Na xuntanza, presidida polo conselleiro de Cultura, Educación e Universidade, Román Rodríguez, avaliouse a proposta da Universidade de Vigo para a creación destes novos centros universitarios. Ambos recibiron o apoio unánime dos integrantes deste órgano.
No caso da facultade de Deseño, concentrará a formación integral de estudos especializados de deseño que ata o de agora non existían no sistema universitario galego. Así, acollerá tanto o futuro Grao en Deseño, que a Universidade de Vigo prevé comezar a impartir no curso 2022-2023, como o Máster en Deseño e Dirección Creativa en Moda.
Pola súa banda, a nova facultade de Dirección e Xestión Pública permitirá albergar o Grao en Dirección e Xestión Pública e o mestrado virtual en Dirección Pública e Liderado Institucional, que nestes momentos se están a impartir na facultade de Ciencias Sociais.
A Facultade de Deseño terá a súa sede no espazo cedido á universidade no antigo edificio administrativo da Xunta en Benito Corbal e, segundo recolle a súa memoria, contaría cun estudantado estimado de 260 alumnos e alumnas, con 22 profesores equivalentes a tempo completo.
A Facultade de Dirección e Xestión Pública tería un estudantado estimado de 212 alumnos e 41 docentes, 16 deles con dedicación total ás titulacións da facultade. O novo centro compartirá o edificio da actual Facultade de Ciencias Sociais e da Comunicación.
Non obstante, a Universidade de Vigo atópase traballando co Concello de Pontevedra nun convenio que faría posible á cesión dunha parcela nos terreos que ocupaba antigamente Tafisa, na que a institución académica proxecta a construción da futura sede destas dúas facultades.
Estas propostas, unidas tamén a aprobación da facultade de Relacións Internacionais no campus de Ourense, reforzarán a oferta académica da Universidade de Vigo.
Relacionadas:
-
Unha pantalla de madeira illará, a finais de 2023, o campus do ruído do tráfico da avenida de Compostela
Por Anxo Lourido |
-
Ratifican a creación das novas facultades de Deseño e de Dirección e Xestión Pública
Por Redacción |
-
O novo edificio universitario será unha "construción modular" que se poderá ampliar se chegan máis titulacións
Por Alejandro Espiño |
-
O novo grao de Deseño ofertará 45 prazas no seu primeiro ano
Por Alejandro Espiño |
-
Ciencias Sociais quere pasar a ser a Facultade de Comunicación
Por Redacción |
-
Grupos de investigación do campus exploran vías de colaboración co sector da creatividade e a comunicación
Por Redacción |
-
O acceso a Ciencias da Actividade Física e do Deporte seguirá sen probas físicas
Por Redacción |
-
O Concello dará 'vía libre' ao novo edificio universitario para Deseño en Tafisa
Por Alejandro Espiño |
-
Estudan novas titulacións para o campus que sexan "acordes" á súa especialización
Por Redacción |
-
O novo edificio universitario de Tafisa será unha realidade antes de que remate a primeira promoción do Grao de Deseño
Por Redacción |
-
O campus prepara un cóctel de eventos para revolucionar a axenda científica, cultural e artística da cidade nos próximos anos
Por Redacción |