A masiva afluencia de mozos e mozas ao 'botellódromo' do Recinto Feiral durante a pasada fin de semana levou ao Concello a dar por "resoltos" os problemas e "desaxustes" na convivencia do centro histórico que se estaban rexistrando desde hai tempo.

Anabel Gulías, portavoz do goberno municipal, quixo "agradecer" a todas as partes que contribuíron a que esta estratexia "funcionase".

"Se está resolto o problema, o balance que facemos é positivo", sinalou Gulías, que avanzou que a programación de actividades no 'botellódromo' seguirá "polo menos" durante a próxima fin de semana.

O Concello defende que o obxectivo desta medida era que o centro histórico volvese ser un lugar de "convivencia múltiple" onde se conxugase os dereitos dos residentes, dos hostaleiros e das persoas que acoden alí no seu tempo de lecer.

Con respecto aos controis policiais, durante a noite do venres non houbo "incidencias a resaltar", segundo a portavoz municipal.

Mentres tanto, o sábado foron denunciados dous menores por beber alcol na vía pública, un no Recinto Feiral e outro no centro histórico. Recibirán unha sanción de 601 euros cada un, segundo recolle a normativa.

Ademais, un local do ámbito de Valentín García Escudeiro foi denunciado por exceder o horario que ten fixado e outro establecemento de Cruz Gallástegui por exceso de veladores.