O mega brote de covid-19 derivado de diversas viaxes de estudantes de toda España a Mallorca xa suma na a área sanitaria de Pontevedra e O Salnés un total de 85 positivos. Na última xornada sumáronse cinco máis froito dos cribados intensos que se están realizando. 

Os datos, recompilados ao mediodía deste martes, derivan das probas PCR que se realizaron á contorna dos que xa deron positivo nas xornadas previas e tamén entre alumnado de todos os institutos da cidade que poden estar en contacto cos mozos que viaxaron a Baleares, no seu caso, nunha viaxe privada no que participaron alumnos de dous centros diferentes. 

Pontevedra mantense como a área sanitaria máis afectada de Galicia por este brote e ao redor da metade dos casos detectados correspóndese con pacientes co variante delta ou india da covid-19. 

En toda a comunidade hai 108 casos confirmados, seis máis confirmados nas últimas 24 horas. Dos seis novos, cinco detectáronse en Pontevedra e un en Vigo. 

Ademais dos 85 de Pontevedra, hai 10 en Vigo, de modo que na provincia hai xa 95 casos e o resto están en Lugo (10) e Ourense (3). 

Para as próximas xornadas, a Consellería de Sanidade decidiu incrementar os cribados a estudantes de Bacharelato e nos próximos cinco días convocarán a facer probas PCR voluntarias a un total de 932 estudantes de primeiro de Bacharelato de dez centros educativos da cidade. 

Os cribados están dirixidos a estudantes do centro no que se detectaron os primeiros positivos, o Sánchez Cantón, e tamén dos institutos A Xunqueira I, A Xunqueira II, Frei Martín Sarmiento, SEK, Sagrado Corazón, Valle Inclán, Los Sauces, Luís Seoane e Torrente Ballester.

A maiores, este mércores 30 de xuño hai convocado un cribado xeral entre a poboación de 17 a 19 anos de Poio, no que están chamados a participar unhas 330 persoas.

Ademais, este martes 29 realizouse no aeroporto de Lavacolla de Santiago un cribado a 86 alumnos galegos que aínda permanecían en Mallorca, unha parte deles de Pontevedra. Todos os estudantes sometéronse ás probas PCR. 

Outros 12 alumnos galegos permanecen en Mallorca en corentena en hoteis e illados por sospeitas de posibles contactos con positivos.