Bará reclama axudas directas para as confrarías ante a caída dos ingresos nas lonxas
Por Redacción
Ante a crise económica que a pandemia da COVID-19 está a crear no sector mar en Galicia, o BNG entende que a Xunta ten que apoiar "sen tatexos" ás confrarías, aumentando as axudas directas para compensar a caída dos ingresos nas lonxas e garantir a súa viabilidade.
Así o destacou o cabeza de lista por Pontevedra ás eleccións galegas, Luis Bará, que mantivo este xoves un encontro con representantes das tres confrarías do fondo da ría de Pontevedra para coñecer o impacto do coronavirus na súa actividade.
Bará entende que as axudas ás que se puideron acoller as mariscadoras como persoas autónomas deben ampliarse ás propias confrarías, moitas delas afectadas por ERTE e coa súa actividade diminuída pola crise sanitaria.
Representantes das agrupacións indicaron que prevén retomar a actividade a partir da próxima semana acolléndose á posibilidade do 25% de ingresos, co problema da baixada dos prezos e da demanda pola paralización da actividade hostaleira.
Ante esta situación, o BNG reclama unha campaña por parte da Xunta para fomentar os produtos galegos de calidade e o seu consumo entre a cidadanía xeral. Tamén aposta porque se adquiran estes produtos para o subministro de comedores, residencias ou hospitais públicos, de xeito que teñan unha canle de saída.
Outra das reclamacións que o nacionalista considera importante nestes momentos de crise é a regularización dos prezos en orixe para evitar os abusos que se producen e as grandes diferenzas que hai entre orixe e os prezos finais en todos os produtos do mar.
Así mesmo, o candidato fixo súa a petición do sector de poñer en marcha unha etiquetaxe da trazabilidade dos produtos galegos do mar, xa que son produtos "con bo cartel, boa imaxe e boa calidade".
Ademais, Luis Bará subliñou que é "necesario" un cambio na política galega o vindeiro 12X que poña "realmente en valor o local" e Galicia poida ter maiores competencias para decidir sobre a xestión dos seus recursos "e non ser unha xestoría de Madrid".
Relacionadas:
-
Luís Bará demanda máis dereitos laborais e económicos para o persoal de servizos esenciais
Por Redacción |
-
Bará aposta por estender dende o goberno galego o "modelo BNG" a toda Galicia "para un rural de excelencia"
Por Redacción |
-
O BNG aposta por unha grande mobilización social para as eleccións "non hai nada decidido, todo é posible"
Por Oskar Viéitez |
-
O BNG ratifica as súas listas para o 12X con Bará como candidato por Pontevedra
Por Redacción |
-
O sector pesqueiro e marisqueiro da ría de Pontevedra mantén a esperanza pola recuperación da actividade
Por Oskar Viéitez |
-
As confrarías de pescadores din estar "desamparadas" polas administracións públicas
Por Oskar Viéitez |