O PSOE provincial afirma que Luis López leva un ano gobernando na Deputación "sen ideas, sen ambición e só con palabrería"
Por Mónica Patxot & Anxo Lourido
Ana Laura Iglesias, portavoz do grupo provincial socialista, ofrecía acompañada polos integrantes da agrupación a súa visión do ano que Luis López, do Partido Popular, leva á fronte da Deputación de Pontevedra.
Criticou o "balance triunfalista" realizado por López esta mesma semana e atacou o lema popular: "lonxe de tender pontes, parece estar voando pontes", manifestou Iglesias.
A representante socialista incidiu en que o goberno provincial pasou "seis meses paralizado coas pantallas en modo pausa" e outros seis meses "ao tran tran" reaccionando ás denuncias que realizaba o PSOE.
"Un ano de marcha atrás, de inacción, de escaso traballo, de vagancia", cualificou Ana Laura Iglesias a xestión do PP á fronte da institución.
Lembrou a "precipitada saída" de Marta Fernández-Tapias, vicepresidenta primeira da Deputación, aos poucos meses de asumir o cargo e insistiu en que o goberno actual "vive de proxectos que non son seus. O único que fixeron foi cambialos de nome", expuxo sinalando que o goberno de Luis López non achegou "nin unha soa idea nova".
Iglesias tachou de "falacia" as críticas populares á falta de fondos na Deputación ao sinalar que a institución conta cunha liquidez de case 200 millóns de euros, despois da etapa do bipartito, que encabezaba a socialista Carmela Silva.
Acusou ao PP de realizar "purgas nas xefaturas e caza de bruxas" ou de tentar frear escándalos como o do deputado da Guarda "cobrando sobresoldos" ou o "caciqueo" das entradas do partido da selección feminina disputado no Estadio de Pasarón.
A deputada socialista asegurou que con este goberno "volve á censura" sinalando tamén o cesamento do director do Museo de Pontevedra como unha "purga ordenada por Rueda" co obxectivo de "volver á cultura do chiringuito".
Ademais lamentou a utilización partidista dos plenos provinciais por parte do PP "funcionando como unha sucursal de Génova para criticar a Pedro Sánchez".
Ana Laura Iglesias fixo fincapé na parálise total nas infraestruturas ao sinalar que todas as obras deste ano en estradas foran redactadas, aprobadas, adxudicadas e financiadas polo goberno bipartito.
"Agora non hai ningunha obra nova", denunciou para cualificar ao equipo de Luis López como un goberno "sen ideas, sen ambicións e só con palabrería".
Tamén criticou o castigo a asociacións de mulleres coa eliminación do servizo específico de Igualdade integrándoo en Benestar Social "sen programación propia"; de maneira similar ao que sucede coa supresión das áreas de memoria democrática, sinalaron os socialistas.
"En Cultura racharon con oito anos de vangarda para pasar á nada absoluta", adviritó para explicar que en materia deportiva "nunca se demorou tanto as subvencións a clubs" alertando de que na actualidade as entidades deportivas seguen sen cobrar as axudas provinciais: "non foron capaces de sacar as bases dás subvencións", que co bipartito publicábanse no mes de febreiro.
"É un claro exemplo de vagancia e de non saber traballar para os cidadáns", concluíu Ana Laura Iglesias, anunciando que o grupo provincial do PSOE seguirá denunciando estas situacións e traballando para "mellorar a vida" da cidadanía pontevedresa.
Relacionadas:
-
Luis López escusa o atraso nas concesións de axudas a clubs deportivos da Deputación nas "disparidades de calendarios"
Por Anxo Lourido |
-
Colectivos da memoria lamentan a "total eliminación" da programación sobre memoria na Deputación
Por Redacción |
-
A Bienal, a apertura dos xardíns de Santa Clara e avanzar na reforma dos edificios centrais do Museo, retos de Rafa Domínguez
Por Mónica Patxot & Anxo Lourido |
-
Luis López resume o ano á fronte do goberno da Deputación: "en lugar de buscar diferenzas, buscamos acordo"
Por Mónica Patxot & Anxo Lourido |
-
O PSOE pide á Deputación un "plan extraordinario e ambicioso" para os concellos
Por Oskar Viéitez & Mónica Patxot |
-
O pleno provincial reproba a Pedro Sánchez nunha sesión na que estrea o uso da intelixencia artificial
Por Oskar Viéitez & Mónica Patxot | Creada e actualizada
-
O PSOE acusa de deslealdade ao PP por non recibir na Deputación a 15 alcaldes socialistas
Por Oskar Viéitez |
-
Os socialistas requiren "explicacións urxentes" polo "peche con nocturnidade" da oficina de turismo do Mosteiro de Armenteira
Por Redacción |
-
O presidente da Deputación ve "xustificado" un pleno extraordinario só para que tome posesión unha deputada
Por Oskar Viéitez |
-
Denuncian o "apagón" no portal de Transparencia da Deputación
Por Oskar Viéitez |