O Pontevedra queda sen marxe de erro na súa carreira pola permanencia
Por Manu Otero
A contundente derrota do Pontevedra o pasado sábado en Pasarón fronte ao Mérida deixa ao equipo de Juan Señor sen apenas marxe de manobra para conseguir a permanencia en Primeira Federación.
Os granates teñen por diante cinco xornadas con rivais directos, salvo Unionistas cuxas dúas últimas vitorias déixano virtualmente salvado, na carreira por continuar un ano máis na categoría de bronce do fútbol nacional. San Fernando, San Sebastián de los Reyes, Talavera, Unionistas e Badaxoz son os próximos cinco adversarios dun Pontevedra que pechará a liga o 28 de maio contra o Deportivo.
Os de Señor marchan actualmente en penúltima posición con 31 puntos, a cinco do Fuenlabrada, décimo quinto con 36 puntos. Para dar caza ao cadro madrileño, precisan os da Boa Vila sumar dúas vitorias. Todo iso supoñendo que nin os do Fernando Torres nin o resto de perseguidores somen puntos.
Dado que nas próximas xornadas haberá choques directos entre rivais que foxen da zona de perigo, cabe esperar que algúns deles somen puntos, polo que os granates deben aspirar a gañar polo menos dous partidos adicionais para manterse na pelexa ata a última xornada.
De feito, con catro triunfos en seis partidos, o Pontevedra sumaría un total de 43 puntos. Unha cifra que, a xulgar polo ocorrido na primeira edición desta categoría, serviría para conseguir o obxectivo. O ano pasado o Talavera foi o mellor clasificado dos descendidos con 42 puntos. Pola contra, no grupo segundo foron necesarios os 47 puntos para manterse.
Xogar contra rivais da zona baixa, de traxectoria tan irregular como a do Pontevedra e os momentos de bo xogo demostrados polos de Señor en xornadas previas son os motivos para o optimismo que esgrimen os granates máis crentes. Ter que sumar fóra de tres en tres e gañar en seis partidos máis xogos que os conseguidos por Señor ou os mesmos que os logrados por Antonio Fernández, lastran a mochila do pesimismo.
Con todo, se algo demostrou o vestiario granate nas últimas tempadas é que nunca tira a toalla. Co obxectivo de loitar ata o final preparan xa os de Juan Señor a primeira dunha auténtica rolda de seis finais, a que terá lugar o vindeiro domingo ás 16 horas na localidade gaditana de San Fernando.
Esta xornada inclúe duelos decisivos para a zona baixa como o Linense-Alxeciras, Badaxoz-Fuenlabrada, San Fernando-Pontevedra, así como dous duelos difíciles para Ceuta e San Sebastián de los Reyes, que visitan ao Deportivo e reciben ao Racing de Ferrol, respectivamente. Se a ruleta decide deter a bóla na casa granate, o Pontevedra podería afrontar o seguinte duelo contra o San Sebastián de los Reyes a só tres puntos da salvación.
Relacionadas:
-
O Pontevedra asómase ao precipicio de Segunda RFEF tras empatar ante Unionistas (1-1)
Por Almu Dapena & Cristina Saiz |
-
Derrota en San Fernando dun Pontevedra abocado ao descenso salvo milagre (4-2)
Por Almu Dapena |
-
O Pontevedra non está para "feiras"
Por Redacción |
-
O coeficiente de goles, outro factor decisivo en xogo para o Pontevedra na batalla final pola permanencia
Por Manu Otero |
-
O Pontevedra blinda o plantel para fixar o foco na final de San Fernando
Por Manu Otero |
-
Juan Señor, tras o 1-5 ante o Mérida: "Nos pasaron por encima"
Por Almu Dapena & Cristina Saiz |
-
O Mérida golea a un Pontevedra que fixo augas en defensa (1-5)
Por Almu Dapena & Cristina Saiz |
-
A carreira pola permanencia ponse moi quente
Por Manu Otero |
-
O Pontevedra enlaza dúas vitorias consecutivas en liga por primeira vez esta tempada
Por Manu Otero |
-
O Pontevedra desperdicia outra oportunidade para achegarse á salvación, agora un punto máis lonxe
Por Manu Otero |