Calvo Xiria non dá opción a BM Pontevedra (33-22) e Poio Artai cede ao final fronte a Lavadores (23-29)
Por Redacción
Se poucas posibilidades de puntuar tiña o BM Pontevedra na súa visita ao Calvo Xiria, uns dos máximos favoritos da competición, os de Pedro Pérez enterraron esas opcións ao presentarse en Carballo con oito xogadores e por tanto con só un home para poder efectuar as substitucións e rotacións en pista.
A consecuencia lóxica foi unha fácil vitoria do equipo local, que non tivo problemas para abrir oco no luminoso xa desde os primeiros compases de partido.
BM Pontevedra non conseguiu facer fronte ao seu rival en ningún momento, como o proba o feito de que aos nove minutos de xogo o marcador reflectía un claro 7-1 favorable ao Calvo Xiria, que chegaría ao descanso con 11 goles de vantaxe (20-9) e o partido resolto.
A segunda parte foi un mero trámite. Os de Carballo reservaron forzas despois de conseguir a máxima vantaxe (25-12) o que evitou a BM Pontevedra sufrir un maior castigo que ese 33-22 final.
Consulta aquí as estatísticas completas do partido.
POIO ARTAI MELLORA PERO NON O SUFICIENTE ANTE LAVADORES
Leve melloría do Poio Artai, pero insuficiente para impedir unha nova derrota na Seca, esta vez a mans de Las Cinco Jotas Lavadores, que se impuxo por un curto marcador (23-29).
Os visitantes foron case sempre por diante, pero a igualdade presidiu un primeiro tempo no que o Poio chegou a soñar coa posibilidade de obter os primeiros puntos da tempada. De feito, ao descanso chegouse cun curto 12-14 que deixaba as espadas no alto para a segunda metade.
Na continuación, o equipo vigués fixo un parcial de 0-3 para marcharse con catro goles de vantaxe (15-19) que soubo administrar ata chegar ao final con ese 23-29.
Relacionadas:
-
BM Pontevedra paga coa derrota os seus erros en Bueu (31-27) e Poio Artai compite pero cae en Lalín (34-26)
Por Redacción |
-
Sen opcións BM Pontevedra en Chapela (29-19) nin Poio Artai ante Seis do Nadal Coia (17-33)
Por Redacción |
-
Derrotas claras de BM Pontevedra ante Luceros (22-28) e Poio Artai na Cañiza (32-25)
Por Redacción |
-
Dous puntos de ouro para BM Pontevedra ante BM Artabro (36-24) e nova derrota de Poio Artai (29-25) en Porriño
Por Redacción |
-
Granitos Ibéricos supera a BM Pontevedra (29-27) e Poio Artai sofre outra malleira (18-32) a mans de OAR Coruña
Por Redacción |
-
Atlético Novas impón a lóxica fronte a BM Pontevedra (21-29) e Poio Artai perde unha final en Redondela (33-14)
Por Redacción |