O Campionato de España de Acuatlón, tamén para un intratable Javier Gómez Noya
Por Diego Espiño & Diego Torrado
Intratable. Así se mostrou Javier Gómez Noya durante a fin de semana en Pontevedra. Se primeiro foi o Campionato de España de Triatlon Sprint, este domingo o triatleta galego foi o mellor no nacional de Acuatlón, celebrado tamén na cidade de Lérez.
Gómez Noya confirmou o dobrete aínda que tivo que remontar nunha carreira na que non se encontrou demasiado cómodo no seu inicio.
Diego Pérez, Luis Miguel Velasquez, Víctor Benages e Kevin Viñuela saíron por diante del tras o tramo de 1.000 metros de natación.
Pero nin con esa desvantaxe foi suficiente, porque dende a quinta posición Gómez Noya empezou a recortar distancia nos primeiros metros dos 5 quilómetros de percorrido a pé e, tras alcanzar a cabeza, marchou en solitario na segunda volta do circuíto para adxudicarse o triunfo.
O campión chegou a meta cun tempo de 28:47, seguido de David Castro (29:11) e o mexicano César Ramiro Saracho, que se xogaron a segunda praza ao sprint. A medalla de bronce do nacional foi para o vigués Antonio Serrat (29:33), quinto en meta pero terceiro español en chegar.
"Só puiden relaxarme nos metros finais, pero o nivel era moi alto e foi unha fin de semana exixente", recoñeceu Javier Gómez Noya ao termo da carreira nunhas declaracións recollidas pola Federación Galega.
Pola súa banda en categoría feminina a vencedora foi a madrileña Paula García, que se repuxo ao tramo de natación, no que o grupo de favoritas se viu prexudicado polas correntes saíndo con certo atraso da auga.
A medalla de prata foi para Estefanía Domínguez, campioa o sábado no triatlon sprint, e a de bronce para Xisca Tous, vencedora en categoría sub-23.
Ademais David Castro foi campión sub-23 masculino, Alberto González e Ana Carvajal gañaron en cadetes e Ignacio González e Inés Santiago en júnior.
Relacionadas:
-
O tríatlon regresa a Pontevedra en 2016: a Copa do Rei e o Nacional de relevos, en maio
Por Alejandro Espiño |
-
Javi Gómez Noya, a polo seu cuarto Europeo de tríatlon acompañado por Pablo Dapena
Por Alejandro Espiño |
-
Gómez Noya gaña con autoridade o Grand Prix de Dunkerque
Por Redacción |
-
Exhibición de Gómez Noya na casa para adxudicarse o Campionato de España Sprint
Por Redacción & Diego Torrado |
-
Gómez Noya promete facelo "o mellor posible" en Pontevedra malia "non ser unha proba prioritaria para min"
Por Diego Espiño |
-
Javier Gómez Noya encabeza a inscrición do Campionato de España de Tríatlon Sprint en Pontevedra
Por Diego Espiño |