Repartición de puntos nun vibrante derbi entre Poio Pescamar e FSF Castro (2-2)
Por Redacción
Empate que sabe a pouco para o Poio Pescamar no último partido do ano na Primeira División. Non pola dificultade do rival, un FSF Castro que é por méritos propios unha das revelacións da tempada, senón por non poder aproveitar a vantaxe de 2-0 que lle tiña costado moito traballo conseguir avanzado xa o segundo tempo.
O conxunto conserveiro deixa asi escapar a oportunidade de pechar 2023 preto a zona de play-off polo título.
Era o regreso á pista da Seca da ata pouco capitá Dani Sousa, e a brasileira foi a primeira en roldar o gol cando apenas transcorrera un minuto de xogo.
O duelo estaba a ser moi competido, e Laura Uña probou sorte finalizando unha xogada colectiva ao bordo da área que Lucía Paz enviaba a córner. De feito as gardametas mostrábanse seguras, e tamén Elena blindaba a portería do Poio Pescamar salvando sobre todo un man a man con Ana Ontiveros.
Luis López-Tulla paraba o partido e o seu equipo melloraba, pero non conseguía o premio do gol nun primeiro acto que se pechaba con empate a cero.
Pasaban os minutos sen que o marcador se movese. O duelo estaba en detalles, e nesas Elena sacaba unha contra rápida coa man cara á carreira de Carla Ayensa, que era derrubada pola visitante Teté. Falta que supoñía a segunda amarela, dando dous minutos en superiodad ao Poio.
Era a oportunidade das locais, e aproveitárono. Rozouno Laura Uña en apenas segundos, pero finalmente foi Saki a que embocou a gol unha rápida combinación do seu equipo no minuto 5 do segundo acto para poñer o 1-0.
Pouco despois, co Castro tentando lanzarse a por a igualada, Ale de Paz roubaba en media cancha e culminaba unha rápida transición no segundo gol, que poñía moi de cara o choque con só 10 minutos por xogarse.
Non se rendeu con todo o cadro visitante, que a cinco minutos para a conclusión apostaba polo xogo de cinco. Unha superioridade numérica en campo contrario que lle saíu ben, e é que Luisa Mayara aproveitaba un balón solto para recortar distancias. Aínda por riba un minuto despois Ana Ontiveros aproveitaba un agasallo da defensa vermella na saída de balón para facer a pracer o 2-2.
A renda se tiña esfumado con catro minutos por diante, un tempo que non lograron aproveitar as locais para anotar de novo, tendo que conformarse co empate.
Relacionadas:
-
Tres puntos de ouro para o Poio Pescamar ante o Móstoles (4-1)
Por Almu Dapena & Cristina Saiz |
-
Partidos de enorme valor para Poio Pescamar e Marín Futsal
Por Redacción |
-
Primeiro triunfo do ano para o Poio Pescamar (0-3)
Por Almu Dapena |
-
O Poio Pescamar evita os 'cocos' no sorteo da Supercopa de España
Por Diego Espiño |
-
Dobre presenza do Poio Pescamar na primeira convocatoria do ano da Selección Española
Por Redacción |
-
O Poio Pescamar mira cara a Torremolinos
Por Redacción |
-
Vacacións de Nadal como punto de inflexión para cambiar o rumbo en liga
Por Redacción |
-
'Manita' do Poio Pescamar ao Marín Futsal no Derbi da Ría
Por Almu Dapena & Cristina Saiz |
-
O Poio Pescamar queda sen tempo para culminar a remontada (3-4)
Por Redacción & Cristina Saiz |
-
Anna Escribano, á altura da balón de ouro Aitana Bonmatí ou de Pep Guardiola
Por Redacción |
-
O Poio Pescamar queda seco en Melilla (3-0)
Por Redacción |
-
Empate épico entre Poio Pescamar e Futsi Navalcanero (5-5)
Por Redacción & Cristina Saiz |