O festival BDra Gráfica convertirá á Boa Vila nunha cidade de cómic
Por Oskar Viéitez
Entre o 27 e o 30 de xuño celebrarase en Pontevedra o festival BDra Gráfica que tomará as rúas da Boa Vila. Isto último é literal porque durante eses días debuxantes e ilustradores de cómic substituirán cos seus nomes o rueiro tradicional.
O edil de Cultura, Demetrio Gómez, e o impulsor deste Festival, o debuxante e profesor, Kiko da Silva presentaron este mércores os contidos desta segunda edición na que o artista homenaxeado será o galego Miguelanxo Prado.
Na Praza da Ferrería instalarase unha gran carpa de 30 metros que contará con 24 postos, entre librarías e editoras, para coñecer a obra de profesionais como Emile Bravo, Bartolomé Seguí, Keko, Aneke, Carlos Portela, Max, Bea Lema, Fernando Llor, Nil ou Ángel De La Calle, que veñen a presentar e falar dos seus libros.
Tamén acudirán a esta cita outros trinta autores máis que asinarán exemplares e participarán cunha mostra expositiva dos seus traballos para divulgar e dar a coñecer as súas obras.
O festival BDra Gráfica ten previstas seis exposicións. Na Fundación Manuel Moldes, do 27 de xuño ao 29 de xullo, Miguelanxo Prado amosará o proceso de creación do seu novo libro 'Presas Fáciles, Voitres', un novo caso policial de Tabares e Sotillo. A presentación será o xoves 27 de xuño ás 18 horas coa actuación en directo do Cuarteto Vagalume.
Na Facultade de Belas Artes, do 27 de xuño ao 20 de xullo, poderá verse a exposición '45 años de cómics para supervivientes' da editorial La Cúpula que cumpre 45 anos e para celebralo conta a súa historia a partir de 45 cómics emblemáticos.
Tamén a Praza da Ferraría acollerá 'Da idea ao cómic', do 27 de xuño ao 7 de xullo. Os autores convidados neste festival amosan paso a paso os seus métodos persoais de traballo. Unha oportunidade para descubir as distintas maneiras de facer unha banda deseñada.
No Teatro Principal, do 27 de xuño ao 29 de xullo, estará o 'Homenaxe a Akira Toriyama' por parte do alumnado do Garaxe Hermético que rende homenaxe ao creador de Songoku e Arale, cunhas versións persoais dos seus personaxes.
Sen saír do Teatro Principal, e nas mesmas datas, tamén está a exposición de Ene e Alba Chan gañadoras da V edición do Premio "O Garaxe Hermético", coa súa primeira obra 'Idol' e a exposición dos libros dos 35 autores que pasarán por BDra Gráfica para presentar e asinar exemplares das súas obras.
CINEMA
E da man de Novos Cinemas exhibiránse os filmes 'Nicky aprendiz de bruxa' de Hayao Miyazaki, no Teatro Principal o domingo 30 de xuño ás 17:00 horas e con entrada libre.
Na Casa das Campás, o venres 28 de xuño, ás 13.00 horas, proxectarase a película 'Carbón', unha historia de Max e Cesc Mulet.
E o domingo 30 de xuño no Teatro Principal, poderase ver 'Crumb', de Terry Zwigoff. Un documental sobre a vida do debuxante de cómics underground por excelencia, Robert Crumb, autor entre outros de personaxes como Fritz o Gato. Unha persoa excéntrica, a partes iguais entrañable e enfermiza, cuxa arte estivo na fala da xente desde hai máis de 30 anos.
XORNADAS PROFESIONAIS
BDra Gráfica tamén é un lugar para reflexionar sobre os problemas dos profesionais deste sector e un lugar para a análise, debate e formación profesional da 9ª Arte. Neste sentido, no Teatro Principal haberá unha charla de 'Fisioterapia para autores' impartida por Hugo Ogando na que falará dos coidados das costas e hábitos saudábeis nos debuxantes e guionistas de cómics.
Esta prevista unha Master Class de Emile Bravo (Autor de Spirou, Diario de un Ingenuo, La esperanza pese a todo) que falará da xénese da súa carreira no cómic, as súas motivacións, as súas eleccións gráficas, a fundación de talleres, a emulación e a creatividade que alí se desenvolveron cos que se converterían nos grandes nomes do cómic actual: Blain, Sfar, Guibert, Sattouf, Satrapi...
Ademais explicará a súa visión persoal deste medio, que, na súa opinión, aínda non esta ben entendido polo público, nin sequera polos profesionais da edición.
E, por último, Luis Demano, que é ilustrador, deseñador gráfico e profesor, abordará a irrupción da intelixencia artificial xenerativa.
Relacionadas:
-
O BDra Gráfica, un dos festivais onde os autores "nos sentimos más a gusto"
Por Alejandro Espiño |
-
A banda deseñada marca territorio na Ferrería con BDra Gráfica
Por Mónica Patxot & Anxo Lourido |
-
Un centenar de autores asistirán á oitava edición dunha Festa dos Libros cargada de actividades
Por Anxo Lourido |
-
Inaugurada en Carballedo unha mostra de Miguelanxo Prado con ilustracións para o libro 'Os animais de Fraguas'
Por Redacción |
-
Cinco librerías da provincia participan no programa 'Afinidades Electivas' do Ministerio de Cultura
Por Redacción |
-
'Cando sopra o vento' na versión en galego preséntase no Principal
Por Mónica Patxot & Redacción |
-
BDra Gráfica encherá as rúas da cidade en xuño de figuras internacionais do cómic
Por Mónica Patxot & Anxo Lourido |