Salcedo, capital dos pinchos e das tapas por un día
Por Redacción
Salcedo converterase este domingo 11 de novembro na capital galega dos pinchos e das tapas. A Sociedade Cultural de Salcedo organizou para ese día a I Festa Gastronómica Pinchos e Tapas, que terá lugar no pavillón de Cabanas.
Trátase dun evento no que, desde as 11:30 horas, os visitantes poderán degustar unha gran variedade de pinchos e tapas elaborados con produtos típicos de tempada. Jamón reserva ao corte, navallas, polbo da ría, lombo de buei á pedra, callos, lacón con grelos, tortilla ou croquetas caseiras, serán algúns dos pratos que conforman o menú.
Os prezos oscilan entre 1 euro e 2 euros por cada pincho, segundo a súa variedade, e entre os 2,50 euros e os 6 euros por cada tapa. Tamén se disporá dunha gran variedade de viños entre os que destaca o Albariño Gundian, primeiro premio da Festa do Albariño de Cambados 2012.
Nesta I Festa Gastronómica Pinchos e Tapas colaborarán tamén a empresa Más que platos, que son os encargados da preparación dos pinchos e das tapas, e membros da Brilat, que montarán a cociña no exterior do pavillón e unha gymkana no interior.
Ademais da parte gastronómica da festa, a organización preparou un amplo programa cultural. Ás 16:30 horas terá lugar a actuación de Os Alegres e ás 17:30 horas, os máis pequenos da casa terán o seu espazo con diversas actividades infantís. A partir das 20.00 horas, celebrarán unha gran verbena amenizada polo grupo Caoba.