398 entidades colaboran coa campaña #NoCaminasSola para garantir a seguridade das peregrinas no Camiño
Por Redacción
A campaña '#NoCaminasSola: por un Camiño de Santiago libre de violencias machistas' conta neste 2022 con 398 entidades da provincia que colaboran coa intención de reforzar a protección das mulleres que realizan a travesía xacobea. Maica Larriba, subdelegada do Goberno presentaba esta iniciativa que, por segundo ano, busca ofrecer seguridade ás mulleres que emprenden o roteiro en solitario.
A presentación desenvolvíase en Tui e o material informativo distribúese en albergues, farmacias, comandancias e postos da Garda Civil, comisarías da Policía Nacional e dependencias da Policía Local dos distintos municipios de Pontevedra coa intención de previr calquera tipo de violencia contra as peregrinas.
Neste 2022 súmanse 122 organismos máis á proposta, que difunde tarxetas e carteis informativos que inclúen un código QR que enlaza directamente aos teléfonos dos recursos especializados en atención ás mulleres.
"O máis importante é que as mulleres se sintan seguras e que gocen do Camiño", afirmou Larriba, acompañada, entre outras autoridades, polo xefe accidental da Garda Civil en Pontevedra, Manuel Touceda; e polo comisario provincial accidental Ramiro García; ademais do tesoureiro do Colexio de Farmacéuticos de Pontevedra, Ramón Iglesias.
A subdelegada insistiu en que as mulleres deben ter o dereito e a liberdade de poder facer o Camiño de Santiago soas se o desexan. Precisamente, a mensaxe desta campaña céntrase en que non camiñan soas e que non corren riscos porque no momento en que perciban algún perigo sempre terán a alguén ao seu lado. En Pontevedra repartiranse 8.040 tarxetas e 402 carteis desta iniciativa.
A campaña está promovida polas Unidades de Coordinación contra a Violencia sobre a Muller das Delegacións do Goberno de Galicia, Navarra, Aragón, A Rioxa, Estremadura e Castela e León, comunidades que percorre o Camiño de Santiago.
Relacionadas:
-
Preto de 400 establecementos da provincia únense á campaña 'No Caminas Sola'
Por Redacción |
-
O Camiño Portugués, a ruta xacobea máis feminizada, con máis peregrinas mulleres que homes
Por Natalia Puga |
-
O éxito da Oficina Móbil de Atención ao Peregrino adianta a súa chegada este ano ao Camiño Portugués
Por Redacción |