A demolición dos antigos aseos da Praza de España non será a única actuación que acometa o goberno municipal no lateral da casa consistorial máis próximo a Santa María. A reforma de todo este espazo será integral e custará uns 260.000 euros.

O lugar pasará a contar con plataforma única, eliminando as actuais beirarrúas que rodean a zona axardinada, que tamén desaparecerá por ter unha configuración "obsoleta", segundo o edil responsable do centro histórico, Xaquín Moreda.

Tan só se salvará o enorme fento que hai no xardín, polo seu valor botánico e histórico.

O pavimento de toda esta área a rehabilitar, que ocupa 547 metros cadrados, será co mesmo empedrado continuo que ten todo o centro histórico que foi renovado.

Ademais, crearase unha zona de estancia con sete bancos e asentos e renovaranse todos os servizos soterrados, entre eles saneamento e as canalizacións eléctricas e de telefonía, e instalarase un novo sistema de iluminación.

Os antigos aseos, en desuso desde hai moitos anos, serán aproveitados para situar no seu lugar todas as instalacións de climatización que terá a casa consistorial tras a súa reforma integral, cuxas obras comezarán nos próximos días.

Sobre eles haberá unha reixa de ventilación que poderá ser aberta se é preciso, para que os operarios poidan acceder a toda esta maquinaria.

O Concello confía en que este proxecto, que será financiado con cargo á ARI do centro histórico, poida saír a licitación nos próximos días.