A xente fai súa a nova zona de estancia ao carón da Casa do Concello
Por Oskar Viéitez
Foi retirar o valado e de seguido os cidadáns fixeron seu o novo espazo remodelado ao carón da Casa Consistorial. A reforma realizada completa a Praza de España e crea unha zona de descanso con numerosos bancos que semellan unha estación de paso ou unha sala de espera.
A reforma supuxo unha rehabilitación integral da zona e un gran cambio na estética e accesibilidade.
"Abrimos un espazo no que cunha simple ollada xa vemos que gañou moitísimo toda esta praza", indicou o edil de Obras, César Mosquera, acompañado da alcaldesa en funcións, Eva Vilaverde, durante unha visita ao lugar.
"Durante moitos anos a praza maior de Pontevedra foi a Ferraría, mais chegou un momento en que quedou escasa: os concertos e as actividades atraían máis xente cada vez" foi entón cando a Praza de España, segundo dixo Mosquera "pasou a ser esa praza maior que acolle eventos, festas, eventos deportivos... que agora queda completada con esta reforma".
Mosquera sinalou que o resultado da actuación é "moi afortunado", grazas ás solucións que foron escollidas para sacar adiante a reforma, tales como o aproveitamento dos antigos baños en desuso para albergar os novos sistemas de climatización da Casa Consistorial. A obra trouxo consigo tamén a renovación dos servizos soterrados, unha mellora da iluminación, a creación dunha plataforma única xerando unha praza e a posibilidade de conservar o fento xigante do antigo xardín.
Doutra banda, o edil destacou a instalación dos novos bancos, "de sol e sombra, dependendo das horas do día e da época do ano", e que cumprirán coa súa función "á perfección" nunha obra "que supón un agarimo para o espazo público".
"Agardamos que a xente desfrute desta zona desde xa e de cara ás festas e aos concertos da Peregrina", desexou o concelleiro.
O custe total da reforma do lateral foi de 258.846 euros, sendo a empresa Construcciones Ramírez a encargada de facer realidade o proxecto.
Relacionadas:
-
As obras de reforma da casa consistorial estarán finalizadas o 20 de xaneiro, na celebración de San Sebastián
Por Mónica Patxot & Anxo Lourido |
-
A casa consistorial abrirá o seu acceso pola Praza de España só para os actos públicos
Por Alejandro Espiño & Mónica Patxot |
-
A nova imaxe do lateral da casa consistorial será visible en seis meses
Por Alejandro Espiño |
-
A reforma da casa consistorial revela partes ocultas da estrutura orixinal
Por Alejandro Espiño & Mónica Patxot |
-
O lateral da casa consistorial pasará a ser unha plataforma única empedrada
Por Alejandro Espiño |