Os baños públicos da Praza de España, situados nun dos laterais da antiga casa do concello, serán historia moi pronto. Levaban xa moitos anos sen uso e foron clausurados definitivamente a finais de 2017, pero agora serán demolidos por completo.

O Concello ultima un proxecto para reurbanizar todo este espazo que, en parte, será reconvertido para uso da propia casa do concello. A estrutura soterrada será acondicionada para acoller o sistema de climatización do inmoble lindeiro.

A superficie, pola súa banda, terá un aspecto completamente renovado.

Este proxecto, que se executará simultaneamente á rehabilitación da casa do concello, será financiado con cargo aos remanentes do ARI centro histórico.

Este diñeiro, case 353.000 euros, permitirá sacar unha nova convocatoria de axudas para o centro histórico e para o barrio de Estribela.

Os beneficiarios destas subvencións para a rehabilitación de vivendas recibirán entre un 35 e un 40% do custo total das reformas. Poderanse solicitar unha vez sexa publicada a orde no Boletín Oficial da Provincia.

Ata o de agora, nas diferentes convocatorias, as axudas destas áreas de rehabilitación integral permitiron rehabilitar 203 inmobles no centro histórico e 349 en Estribela.