Co hashtag #LaOtraCaraDelPárkinson a Federación Española de Párkinson visibiliza este mes e concretamente este 11 de abril, o Día Mundial dedicado a esta enfermidade. Unha enfermidade neurodexenerativa á que nos achegamos a través de Begoña Cerqueiro que é presidenta da Asociación Provincial (APROPARK) e que pertence á citada Federación.
Trátase dunha doenza cuxa causalidade aínda non está determinada, que se adoita manifestar a partir dos 55anos e cuxa sintomatoloxía e evolución é moi diversa. É unha enfermidade que cursa con dor, físico e evidentemente emocional e cuxo tratamento é farmacolóxico, terapeútico e tamén cirúrxico nalgúns casos. Con todo, a invitada deste 'Cara a cara' descarta tópicos que roldan ao Párkinson: as persoas con párkinson tremen, afecta só a persoas maiores, o párkinson provoca incapacidade ou impide traballar.
Abordamos igualmente con Begoña Cerqueiro o traballo que desenvolven desde a Asociación cun total de 160 pacientes actualmente. Segundo os últimos datos que dispoñen achegados polo Sergas, na provincia hai tres mil persoas diagnosticadas de Párkinson, aínda que estiman que a cifra é superior. Tanto a súa actividade como os recursos económicos víronse limitados ou mermados desde o inicio da pandemia. Precisamente, o peche das piscinas de Pontemuiños prívalles dunha das súas terapias: a hidrocinesiterapia, tesitura na que tamén se viron afectadas outras asociacións como Amencer.
"Necesitamos máis persoas e máis recursos económicos, pero cada vez é máis difícil. As subvencións cada vez son menos, sempre son en concorrencia competititva, co cal unha asociación grande sempre mingua as nosas posibilidades" demanda en PontevedraViva Radio. Sete persoas conforman a directiva de APROPARK e as sete son mulleres. "Estamos a falar do ámbito sociosanitario - Begoña é asistente social - e practicamente todas temos familiares con Párkinson", o que evidencia unha vez máis o peso da muller nos coidados da contorna familiar.