"Os salarios de miseria e a sobrecarga de traballo" levan á folga ás traballadoras das residencias de maiores privadas
Por Oskar Viéitez
A CIG, CCOO e UGT anunciaron esta semana a convocatoria dunha xornada de folga para o vindeiro 18 de marzo nas residencias de maiores e nos centros de día privados de Galicia ante a negativa do empresariado a rematar coa elevada precariedade que padece o persoal do sector.
Estes sindicatos denuncian salarios de miseria, sobrecarga de traballo, cambios nos calendarios e falta de tempo para prestar unha atención de calidade.
Ademais, este persoal, integrado na súa maior parte por mulleres, ten que soportar a falta de valoración psicosocial e modificacións constantes nos protocolos e nos criterios de seguridade.
O anterior acordo laboral caducou en 2019, polo que o persoal do sector continúa cos soldos conxelados dende entón, até o punto de que hai categorías laborais con salarios por debaixo do salario mínimo. Ademáis, o ano pasado pechou cun IPC do 6,5%, porcentaxe que as empresas xa aplicaron no prezo das prazas.
Sinalan que a patronal négase a negociar un convenio colectivo que poña fin á "situación insostenible" na que se atopan máis de 10.000 traballadoras en Galicia e que se viu agravada por mor da emerxencia sanitaria provocada pola pandemia do coronavirus.
Por iso consideran que é o momento de reactivar a negociación colectiva e desbloquear este conflito. En consecuencia, as tres centrais acordaron convocar unha xornada de folga o venres 18 de marzo.
"O dereito a un servizo de coidados de calidade e a prestación de coidados en condicións dignas están sendo vulnerados e non podemos mirar para outro lado", advirten as tres forzas sindicais.
Relacionadas:
-
Isabel Varela, premio 8 de Marzo de UXT: "Non só me honra min, honra a todas as mulleres"
Por Manu Otero |
-
Cuntis adxudica a Sociser Galicia o servizo de Atención Domiciliaria por 1,4 millóns ao ano
Por Redacción |
-
A vella Casa do Mar de Marín comeza a convertirse en centro de día
Por Redacción |
-
Dúas empresas aspiran a xestionar o Centro de Día Virxe do Carme
Por Redacción |