O Entroido de Vilagarcía recupera o desfile de disfraces pero perde o certame de comparsas e o baile infantil
Por Redacción
Despois de un ano sen celebracións do Entroido debido á pandemia, Vilagarcía recupera en 2022 o tradicional desfile de disfraces do martes de Entroido.
O Concello xa está traballando na organización do evento que, ao celebrarse ao aire libre e incluír o correspondente protocolo sanitario, permitirá o desenvolvemento seguro dun dos eventos máis esperados e vistosos do ano e con elo, o regreso da tradición popular do Entroido. Será o 1 de marzo.
O desfile de disfraces mantén a faceta de concurso no que se poderá participar nas diversas categorías establecidas (individuais, parellas e grupos) nas modalidades infantil e de adultos respectivamente. A Concellería de Cultura está elaborando xa as preceptivas bases que regularán o concurso e nas que se establecerán os premios e as contías dos mesmos, así como os prazos de inscrición.
CERTAME DE COMPARSAS
O que non poderá incluír este ano o programa de Entroido do Concello é o certame de comparsas ao non poder contar coa participación das agrupacións locais ás que a Concellería de Cultura se dirixiu previamente.
Segundo lles comunicaron, debido ás restricións sanitarias primeiro e por precaución despois, as comparsas levan meses inactivas sen reunirse para elaborar os vestiarios, as coplas e ensaiar, polo que non será posible contar con elas este Entroido, tendo que esperar un ano máis para poder gozar destas comparsas.
BAILE INFANTIL
O protocolo sanitario aprobado recentemente pola Xunta aconsella tamén prescindir do baile infantil que tradicionalmente ten lugar na Praza da Peixería. Maila isto, a Concellería de Xuventude traballa na organización dalgunha actividade alternativa para os máis cativos, e mantense á espera de coñecer o protocolo específico que ditarán as autoridades sanitarias de cara ás celebracións de Entroido por si, para aquela, flexibilizan as restricións.
Relacionadas:
-
Prepárase o Entroido infantil en Vilagarcía con obradoiros e concurso de disfraces
Por Redacción |
-
O Entroido celebrarase en Bueu con actividades reducidas e sen enterros
Por Redacción |
-
Só as murgas e Ravachol se salvan do tradicional Entroido pontevedrés
Por Alejandro Espiño |
-
Reunión no Concello de Marín para deseñar as actividades do Entroido
Por Redacción |
-
A Xunta permite os desfiles de Entroido pero prohíbe fumar
Por Oskar Viéitez |
-
Suspenden a Festa do lacón con grelos de Cuntis
Por Redacción |
-
Suspendido o Enterro da Sardiña de Marín
Por Redacción |
-
Cancelan o desfile e os enterros tradicionais do Entroido en Poio
Por Redacción |