O Entroido celebrarase en Bueu con actividades reducidas e sen enterros
Por Redacción
O Entroido de Bueu non se celebrará este ano como é habitual, pero o Concello de Bueu, en colaboración coas comparsas da vila e diversas asociacións, organizará actividades de pequeno formato e ao aire libre nas tres parroquias, co obxectivo de ofrecer unha alternativa de lecer para a cidadanía.
A concelleira de promoción económica e turismo, Silvia Carballo, como encargada da organización, reuniuse estas últimas semanas cos colectivos que participan habitualmente nesta festa, polo que se acordou suspender os tradicionais desfiles do Enterriño da Sardiña e do Enterro do Paxaro de Mal Agoiro.
Así, propoñeranse actividades reducidas e adaptadas á actual situación sanitaria da covid-19, como actuacións das comparsas en localizacións das tres parroquias en horarios de mañá e de tarde, que se irán anunciando nos próximos días.
A edil encargada da organización salienta que "ao igual que o ano pasado, debemos actuar con cautela e por iso non podemos celebrar o Entroido como era habitual en Bueu, aínda que acordamos organizar eventos máis pequenos e ao aire libre, tal e como recomendan as autoridades sanitarias", porque "todos coincidimos en que a cidadanía necesita un pouco da ledicia do Entroido".
Así, o Concello ten previsto instalar unha carpa nos Xardíns de Urbano Lugrís, na zona das Lagoas, entre o 25 de febreiro e o 7 de marzo, na que se programarán as actuacións das comparsas no casco urbano, así como obradoiros para a cativada con actividades e xogos relacionados co Entroido.
A iso sumaranse actuacións en lugares como a contorna da Morada, na aldea de Meiro, o Adro de Cela ou o Parque Joe Novas en Beluso.
Ás reunións asistiron representantes das comparsas da vila ademais doutros colectivos culturais e deportivos que habitualmente participan neste evento. Así mesmo, dende o consistorio contactouse coas Asociacións de Nais e Pais do Alumnado (ANPAS).
Relacionadas:
-
Bueu reinventa o seu Entroido para burlar a pandemia
Por Redacción |
-
O Entroido de Cuntis recupera o desfile con distancia de seguridade, máscara e 3.000 euros en premios
Por Redacción |
-
Marín quere que o Enterro da Sardiña sexa festa de interese turístico de Galicia
Por Redacción |
-
A biblioteca acollerá talleres de deseño gráfico, robótica e actividades arredor do Entroido e do Día de Rosalía
Por Redacción |
-
Só as murgas e Ravachol se salvan do tradicional Entroido pontevedrés
Por Alejandro Espiño |
-
O Entroido de Vilagarcía recupera o desfile de disfraces pero perde o certame de comparsas e o baile infantil
Por Redacción |