Perseidas 2021: a choiva de estrelas máis espectacular será esta noite
Por María José Pita
Esta noite do 12 ao 13 de agosto alcanza a súa máxima actividade o fenómeno das perseidas. O Observatorio Astronómico Nacional (OAN) informa, ademais, de que este 2021 será un ano excelente para observalas, xa que "a fina Lúa crecente ocúltase tras o horizonte oeste pouco despois da posta de Sol e permitiranos observar as estrelas fugaces sen problemas".
O horario de maior ritmo de choiva de meteoros será entre as 21 horas deste xoves 12 de agosto e as 00:00 do venres 13. Con todo, tendo en conta que a posta de sol para a xornada deste xoves será ás 21:40 na zona de Pontevedra e comarca, haberá que agardar ata que o ceo se escureza para poder gozar en toda a súa espectacularidade deste fenómeno da natureza.
QUE SON AS PERSEIDAS?
As chamadas estrelas fugaces son en realidade unha choiva de meteoros que sucede todos os anos cara ao 12 de agosto.
As perseidas teñen situado o seu centro de orixe ou radiante na constelación de Perseo, de aí o seu nome. Tamén se lles coñece como como "bágoas de San Lorenzo" pola proximidade do máximo da choiva de meteoros ao 10 de agosto, día da festividade do santo do mesmo nome. A lenda cristiá asóciaas ás bágoas que o mártir verteu ao ser queimado vivo na fogueira en Roma.
POR QUE SUCEDEN?
Os cometas, segundo describen as súas órbitas ao redor do Sol, van lanzando ao espazo un regueiro de gases, po e entullos de materiais rochosos que permanecen nunha órbita moi similar á do cometa proxenitor.
Cada cometa vai formando así un anel no que se atopan distribuídos numerosos fragmentos. Cando a Terra, no seu movemento en torno ao Sol, atopa un destes aneis, algúns dos fragmentos rochosos, chamados meteoroides, son atrapados polo seu campo gravitatorio e caen a gran velocidade a través da atmosfera formando unha choiva de meteoros. A fricción cos gases atmosféricos calcinan e vaporizan os meteoros que aparecen brillantes durante unha fracción de segundo formando o que popularmente denominamos estrelas fugaces. Non se trata por tanto dunha estrela senón dunha partícula de po incandescente.
O COMETA SWIFT- TUTTLE
Cada ano a principios de agosto o noso planeta cruza a órbita do cometa 109 P/ Swift-Tuttle, que ten un período de 133 anos e que pasou preto do Sol por última vez en 1992. Esta órbita está chea de partículas pequenas, como grans de area ou menores, que foron liberadas polo cometa nos seus pasos anteriores. Cando unha destas partículas, que formaron no seu día a cola do cometa, entra na atmosfera terrestre a gran velocidade, a fricción quéntaa ata vaporizala a grande altura.
Polo tanto, efecto luminoso se produce cando estes graniños atravesan a atmosfera terrestre, atraídos polo noso planeta, e volatilízanse.
QUE FACER PARA VER AS PERSEIDAS?
As perseidas son un fenómeno observable desde o hemisferio norte, de feito iniciaron a súa actividade o 17 de xullo e continuarán ata o 24 de agosto. Aínda que parecen vir da constelación de Perseo, pódense ver en calquera parte do ceo, con tal de que teñamos un ceo escuro. Por fortuna, esta noite a previsión para o sur de Galicia é de ceos totalmente despexados.
Serán visibles sen necesidade de usar ningún instrumento especial. O que si é preciso é afastarse das luces das cidades para poder ver un maior número de estrelas fugaces, e nun espazo aberto no que non haxa obstáculos para ver o ceo. Convén dirixir a mirada cara ás zonas máis escuras, na dirección oposta á posición da Lúa se a observación se realiza antes do seu ocaso. O máis cómodo é tombarse e agardar a que a vista se afaga á escuridade.
A cantidade de perseidas observables por hora é moi variable, aínda que poden superar o centenar e alcanzar velocidades por riba dos 50 quilómetros por segundo. Con todo, o número de meteoros pode variar moi rapidamente segundo varía a densidade de fragmentos no ronsel do cometa, por iso as predicións concretas sobre número específico de meteoros por hora son difíciles de realizar.