Pontevedra incorpora 14,6 millóns ao seu orzamento para financiar 52 novas actuacións
Por Alejandro Espiño
Ata os 112 millóns de euros ascenderá o orzamento municipal de Pontevedra para 2021 tras a incorporación de 14,6 millóns que, procedentes dos remanentes de tesourería, destinaranse para financiar 52 actuacións en todo o municipio.
Esta modificación de crédito, que será aprobada nun próximo pleno da corporación, foi presentada este mércores polo alcalde de Pontevedra, Miguel Anxo Fernández Lores, e o tenente de alcalde, o socialista Tino Fernández.
O Concello, destacou Fernández Lores, "rompeu o peto" para dinamizar a economía local e empregar todo o seu remanente para xerar emprego, reactivar a economía e atender ás necesidades máis urxentes das capas sociais máis desfavorecidas.
"Nunca se fixo un volume de investimento semellante en Pontevedra", engadiu o alcalde, que destacou que esta modificación de crédito caracterízase polo seu "equilibrio territorial", ao recoller investimentos en todos os barrios e parroquias do municipio.
Tino Fernández apuntou que estas contas son froito dun goberno "estable" que se viu obrigado a "cambiar prioridades" pola pandemia e que, estivo " á altura" durante todo este tempo "facendo o que nos tocaba e o que tiñan que facer outros e non fixeron".
A partir de agora, engadiu o tenente alcalde, "tócanos cumprir coa previsión do gasto que necesitan os veciños de Pontevedra" e, en clara alusión ao PP, subliñou que "non temos tempo para andar remexendo no esterco" ou para librar "pelexas ridículas e patéticas".
Estes 14,6 millóns de euros sumaranse aos 83 millóns aprobados inicialmente no orzamento e aos 14 millóns que xa se incorporaron a través de diversas partidas de crédito o pasado mes de marzo, segundo explicaron ambos os dirixentes.
Este diñeiro servirá para financiar 52 actuacións, entre as que se inclúen a compra de Santa Clara (3,2 millóns), a mellora de accesibilidade no rural (2 millóns), completar as obras do Castañal (1,43 millóns) ou a reforma das rúas perimetrais de Barcelos (1,12 millóns).
Haberá reformas en parques e zonas verdes (1,6 millóns) e en instalacións deportivas (1,6 millóns), a remodelación das rúas Portugal, Grecia e Bélxica en Monte Porreiro (648.000 euros) ou se acometerá a primeira fase da reforma da casa do concello (300.000 euros).
Outro millón será para o cambio a LED da iluminación en Marcón e Mourente, 285.000 euros para mellorar o Teatro Principal, 300.000 euros para axudas a autónomos para comprar material anticovid-19 e 85.000 euros para ampliar o cemiterio de San Amaro.
Este crédito incluirá tamén 200.000 euros para reforzar a partida de emerxencia social, case 90.000 euros para diversos programas de servizos sociais e igualdade, 72.000 euros para iniciativas de promoción económica ou 75.000 euros para o novo coche oficial do Concello.
Relacionadas:
-
Destinan 440.000 euros a cambiar a iluminación do Teatro Principal e dotalo dun ascensor e aseos adaptados
Por Oskar Viéitez |
-
A reforma do Teatro Principal incluirá iluminación dixital, un ascensor e aseos adaptados
Por Alejandro Espiño |
-
Lores, no ecuador do seu sexto mandato: "Estou máis ilusionado que nunca como alcalde"
Por Alejandro Espiño |
-
A reforma de Barcelos comezará polo vial de circulación perimetral
Por Alejandro Espiño |
-
Pontevedra aproba, coa abstención do PP, incorporar 15 millóns máis ao orzamento
Por Alejandro Espiño & Mónica Patxot |
-
A situación o Concello de Pontevedra "vai seguir estando ben" a pesar de esgotar os seus remanentes
Por Oskar Viéitez |
-
A liquidación do orzamento de 2020 permitirá incrementar os investimentos do Concello a 44 millóns de euros
Por Redacción |
-
Aproban o orzamento municipal para 2021 por 80.734.300 euros, cifra máis alta da historia de Pontevedra
Por Redacción |
-
Supera21 activa un plan de 1,3 millóns en axudas a autónomos e microempresas
Por Alejandro Espiño |