Un xogo de pistas para resolver un crime dos anos 20 dinamizará a rúa Loureiro Crespo este Nadal
Por Natalia Puga & Mónica Patxot
Coñecer Loureiro Crespo ao tempo que se dinamiza o comercio local e se resolve un crime dos anos 20 no que se viu implicado, na súa faceta profesional, o doutor Loureiro Crespo. Este Nadal será posible cumprir este triplo obxectivo a través da nova fase da campaña 'Eu Son Loureiro', coa que a Concellería de Obras de Pontevedra busca "botar unha man ao comercio" desta rúa que está inmersa nun proceso de reforma urbana.
Este luns bota a andar esta nova fase da campaña coincidindo co parón nas obras durante o Nadal e, por este motivo, o concelleiro de Obras de Pontevedra, Demetrio Gómez, acudiu á praza do Hospital para explicar en que consiste.
O Concello puxo en marcha dous roteiros para dinamizar a rúa; deseñou unhas pulseiras co logo da campaña #EuSonLoureiro, que se repartirán en todos os comercios do barrio; e puxo en marcha un filtro de Instagram específico. Todas estas iniciativas están pensadas para poder dinamizar o comercio do barrio ao tempo que se respectan todas as normas que impón a crise sanitaria da covid-19.
En relación cos roteiros, Demetrio Gómez explicou que non poden ser en grupo, senón que se deben facer "respectando as burbullas, as unidades familiares, os grupos de convivencia". Cumprindo esas normas, animan á cidadanía a achegarse ata Loureiro Crespo, ver como vai avanzando a reforma, ver os escaparates e entrar nas tendas e facer gasto no comercio local.
Un destes roteiros está pensado para persoas maiores e pode facerse guiándose por un vídeo que se pode descargar das redes sociais e tamén en cada establecemento do barrio a través de códigos QR instalados nas portas dos establecementos comerciais.
O outro ten un carácter máis lúdico e está pensado para unha poboación de entre 3 a 93 anos. É un xogo de pistas que abre a porta a toda unha aventura que se pode seguir a través de códigos QR que hai en nove tendas deste barrio: Tendencias Floristas, farmacia Pontus Veteris, mobles QKa, perruquería Carlos Conde, Tobico Zapaterías, Salam Halal, Aquelarre, libraría Atenas e perruquería Low Cost.
Demetrio Gómez explicou que é un xogo moi divertido que se basea nun crime que aconteceu nos anos 20 e no que estivo implicado o doutor Loureiro Crespo pola súa calidade de médico. A partir dese acontecemento histórico, a cidadanía pode percorrer a rúa Loureiro Crespo coñecéndoa un pouco máis en profundidade e resolver o misterio.
O concelleiro de Obras animou á cidadanía a empregar o comercio local este Nadal e explicou que en todas as rúas de Pontevedra nas que se realizaron reformas urbanas como a que se está a acometer en Loureiro Crespo o Concello nota que se activa o mercado inmobiliario con persoas interesadas en coñecer a situación dos baixos e locais comerciais da zona "para ver se se poden abrir negocios".
O caso "máis espectacular" deste tipo foi, segundo Demetrio Gómez, a rúa Virxe do Camiño, pois durante a propia obra abriron 4 locais que hoxe seguen en funcionamento.
Relacionadas:
-
Unha exposición na rúa amosa a historia do barrio de Loureiro Crespo a través do comercio
Por Redacción |
-
A tenda Nalatcha gaña o concurso de escaparates de Nadal de Pontevedra
Por Redacción |
-
Primeira capa de rodadura en Loureiro Crespo para deixar a rúa practicable para o Nadal
Por Redacción |
-
O Nadal paraliza as obras de Loureiro Crespo e atrasa as do cruzamento de Daniel de la Sota e Benito Corbal
Por Alejandro Espiño |
-
#Eusonloureiro, a campaña para dinamizar o comercio de Loureiro Crespo, xa ten 42 socios
Por Redacción & Mónica Patxot |