Campo Lameiro activa o seu escaparate comercial virtual a través da súa nova páxina web
Por Redacción
'Campo Lameiro de todo para Tod@s' é a ferramenta que este Concello incorporou á súa nova páxina web para axudar ao comercio local ante os efectos económicos da situación sanitaria xerada pola COVID-19. "Queremos que os nosos comerciantes, empresas, autónomos e emprendedores sexan protagonistas deste portal que pretende visibilizar o noso potencial e fortaleza para saír adiante", anima o alcalde, Carlos Costa.
A pretensión da iniciativa é que sexa un escaparate interactivo virtual dos comercios e dos servizos que ofrece o municipio e que a cidadanía de Campo Lameiro conciencíese da necesidade de comprar e consumir entre os establecementos e profesionais radicados nesta localidade. O proxecto está coordinado pola axente de emprego e desenvolvemento local, Almudena Pérez Fernández, e membros do equipo de goberno.
Neste comezo cóntase con máis de vinte e catro establecementos e pódense ir incorporando aquelas empresas e profesionais que o desexen, enchendo o formulario online que se ofrece na páxina web de Campo Lameiro, ou ben remitíndose ao propio Concello onde se lles facilita un impreso coas correspondentes autorizacións.
Costa, anima a que os veciños empreguen esta nova ferramenta que ofrece "fichas interactivas moi dinámicas con pequenos vídeos, fotografías de produtos e servizos; e loxicamente, un sistema de xeolocalización para facilitar o seu acceso, teléfono, pedidos por Whatsapp ou Facebook. Queremos converter a Campo Lameiro nunha gran referencia comercial e de servizos para os nosos veciños e os da súa contorna".
Relacionadas:
-
Campo Lameiro lanza unha campaña para apoiar o comercio local ante a pandemia
Por Redacción |
-
O PAAR de Campo Lameiro presenta a súa programación de verán
Por Redacción |
-
A tarxeta Xente Nova comezará a emitirse este mércores nos concellos da área de Pontevedra
Por Oskar Viéitez |
-
Campo Lameiro crea un banco de empresas para reactivar a economía local
Por Redacción |