'El Peque' que revolucionou o Avelino Montero enfróntase a 25 anos máis de cárcere
Por Oskar Viéitez
José Luis Martíns Mendoza, El Peque, de 43 anos, está considerado un dos delincuentes máis violentos da provincia. Na cidade de Pontevedra tamén deixou o seu selo. E non para ben, tanto na súa faceta de delincuente adulto coma de incorrexible adolescente.
Nacido no barrio vigués de Cabral, El Peque empezou no mundo da delincuencia sendo moi neno, da man do seu irmán, Luis Ramiro, alcume o Martíns, doce anos maior ca el e cun amplo historial delituoso. O Peque era o "rapaz dos recados" dalgunhas bandas de atracadores.
Con 13 anos ingresou no Centro de Menores Avelino Montero de Pontevedra. Foi a raíz da súa estanza que este reformatorio pasou a ter un réxime semi-pechado. Os educadores recórdano como "un neno moi problemático que sempre estaba a buscar pelexa".
No seu historial policial figuran numerosos roubos de vehículos, casí sempre vinculados a un roubo a unha entidade bancaria, a súa auténtica especialidade. Nos seus antecedentes máis destacados consta que aos 22 anos participou nos atracos a unha sucursal de Caixa Ourense, ao Banco Borges & Irmao en Valença, e á sucursal do Banco de Galicia de Pontevedra en febreiro de 1998.
Ese mesmo ano foi detido tras intentar matar tres policías en Vigo e Redondela. O pequeno dos Martíns Mendoza non dubidou en disparar coa súa metralladora cando a policía local intentou identificalo.
Durante o xuízo celebrado no ano 2000, ambos os dous irmáns declaráronse culpables. O fiscal pediu para eles 55 anos de cárcere e a Audiencia de Pontevedra condenouno a nove anos e seis meses.
Foi tras a súa saída de prisión en maio de 2010 que El Peque comezou a planificar novos golpes. Antes do atraco mortal da Cañiza que se está a xulgar dende este luns 17 de xuño na Sección Segunda da Audiencia Provincial de Pontevedra, terían intentado un butrón noutra sucursal bancaria e o asalto dun piso da rúa Arquitecto Pérez Bellas, ambos os dous en Vigo.
Agora enfróntase a 25 anos e oito meses máis de cárcere que se unirían á estanza que xa pasou entre reixas.
A súa perigosidade quedou latente estes días co forte dispositivo de seguridade despregado pola Policía Nacional e a Garda Civil dentro e fóra da Audiencia Provicial. No exterior, media ducia de vehículos custodiaban o edificio (a imaxe repetirase este xoves, último día do xuízo) e no interior, os axentes limitaron o acceso libre a todo o inmoble.
Relacionadas:
-
UXT alerta de "propostas de peche e privatización de servizos" no centro de menores Avelino Montero
Por Oskar Viéitez |
-
Cinco traballadores de seguridade denuncian impago no Centro de Menores Avelino Montero
Por Redacción |
-
Condenan a 76 anos de cárcere os tres atracadores dunha sucursal da Cañiza pola morte dun garda civil
Por Oskar Viéitez |
-
"No quiero venganza lo que pido es Justicia", di a viúva do garda civil tiroteado
Por Oskar Viéitez |
-
O atracador que matou un garda civil asegura que os seus disparos foron fortuítos
Por Oskar Viéitez |
-
O fiscal pide 25 anos de cárcere para o atracador acusado de matar un garda civil na Cañiza
Por Oskar Viéitez |