O atracador que matou un garda civil asegura que os seus disparos foron fortuítos
Por Oskar Viéitez
José Vilar Casal, autor dos disparos que remataron coa vida dun garda civil e feriron outro durante un atraco na Cañiza en agosto do 2010, asegurou este luns durante o xuízo que a súa arma se disparou "accidentalmente, durante el forcejeo". "Si le quisiera matar le hubiera disparado cuando tenía el cañón apoyado en su cabeza", explicou ao tribunal.
Vilar Casal, alcumado "Pepiño" sentouse este luns no banco dos acusados da Audiencia provincial de Pontevedra xunto aos outros dous membros da banda, José Ángel Martíns Mendoza, alcume "El Peque" e Fernando Condines.
Os tres admitiron que estaban compinchados para apoderarse do diñeiro da caixa de seguridade da sucursal da entidade bancaria Caixa Galicia na Cañiza, que por aqueles días celebraba a Festa do Xamón.
O método empregado sería un butrón practicado dende o edificio lindante. Segundo explicou José Vilar, o burato fíxose na tarde anterior ao suceso. O plan era que Fernando vixiase na rúa dende o seu coche mentres que Pepiño e o Peque entrarían na sucursal a primeira hora, amordazarían aos empregados segundo fosen chegando ata ameazar coa pistola o director da sucursal para que lles entregase o seu botín.
As cousas seguían segundo o previsto. Co butrón feito, Pepiño e Peque chegaron mesmo a participar da festa do xamón, consumindo ademais "cocaína, heroína e alcohol", segundo relataron o tribunal. Ás seis da mañá volveron á sucursal, antes Vilar tomou "un Trankimazín".
Non obstante os plans truncáronse ao meter as bolsas no banco, xa que estas fixeron saltar a alarma silenciosa alertando a Garda Civil que dende O Covelo chegaron ao lugar dos feitos.
Ao ser descubertos, Pepiño díxolle ao axente que os deixara marchar "que aquí non pasaba nada". Vilar Casal precisou que deu un paso adiante e que o outro garda lle disparou, alcanzándoo no colo, segundo a versión de José Vilar Vilar "sentí que me querían matar y que iba a morir".
Asegurou o acusado que "escoitou" como a arma se encasquetou, nese instante Pepiño sacou a súa pistola e apuntou a vítima na cabeza momento no que outro axente o agarrou polo colo arrastrándoo cara ao interior. "Se inició entonces un forcejeo", durante o cal se produciron os disparos que remataron coa vida do garda civil Jorge Piñeiro "estaba todo muy oscuro. Durante el forcejeo se produjeron disparos sin que yo haya apretado el gatillo", repetiu Vilar. Os disparos alcanzaron ao axente Jorge Piñeiro no pulmón, o corazón e o fígado.
Os outros acusados negáronse a contestar ás preguntas das acusacións. O Peque respondendo á súa avogada dixo que nunca viu o seu compañeiro apertar o gatillo, xa que fuxiu do lugar á carreira.
O fiscal xefe, Juan Carlos Aladro solicita penas que suman 25 anos de prisión, para José Vilar Casal, acusado dun delito de homicidio en grao de tentativa, ademais de roubo con violencia e intimidación en grao de tentativa e tenza ilegal de amas. O Peque enfróntase a 5 anos de cárcere por intento de roubo e tenza ilegal de armas. A mesma pena que se pide para Fernando Condines, encargado da vixilancia exterior da sucursal mentres os seus compañeiros abrían o butrón.
Durante a primeira sesión do xuízo tamén declarou a viúva do garda civil tiroteado que explicou ao tribunal que están a recibir "tratamento médico" a raíz do suceso, concretamente tanto ela coma os seus tres fillos participan en "terapia familiar".
En concepto de responsabilidade civil, a Fiscalía solicita que José Vilar indemnice á viúva do axente falecido en 108.846 euros e a cada un dos tres fillos menores do matrimonio con 45.352 euros.
Tamén resultou rechamante o testemuño do Capitán Xefe da Policía Xudicial da Garda Civil de Pontevedra que explicou que a UDEV da Policía Nacional estaba a facer un seguimento dos tres acusados e sabían que estaban a planear un golpe pero que non foron notificados ata que se produciu o atraco.
O xuízo seguirá o próximo mércores na Audiencia Provincial de Pontevedra que hoxe estaba tomada por fortes medidas de seguridade.
Relacionadas:
-
Condenan a 76 anos de cárcere os tres atracadores dunha sucursal da Cañiza pola morte dun garda civil
Por Oskar Viéitez |
-
Os atracadores da Cañiza piden perdón á viúva e aos orfos do garda civil falecido
Por Oskar Viéitez |
-
'El Peque' que revolucionou o Avelino Montero enfróntase a 25 anos máis de cárcere
Por Oskar Viéitez |
-
"No quiero venganza lo que pido es Justicia", di a viúva do garda civil tiroteado
Por Oskar Viéitez |
-
O fiscal pide 25 anos de cárcere para o atracador acusado de matar un garda civil na Cañiza
Por Oskar Viéitez |