Vinte e catro policías locais, de baixa días antes dos mundiais de tríatlon
Por Redacción
O Concello de Pontevedra enviará un escrito ao Servizo Galego de Saúde (Sergas) para que verifique a 'epidemia' de baixas que atravesa a Policía Local. Un total de vinte e catro axentes, case un de cada catro policías en persoal, a día de hoxe está fóra de servizo por enfermidade. E todo iso, a escasos días de que comecen os mundiais de tríatlon.
O últimos sete policías afectados, segundo trasladan fontes municipais, presentaron a súa baixa na última semana. O Concello asegura que esta situación vén repetindo regularmente desde hai un ano e "extrémase" cando chegan eventos "singulares" como o que acollerá Pontevedra a partir do venres.
Por iso, o goberno municipal quere que as autoridades sanitarias comproben se efectivamente estas baixas impiden aos policías locais desempeñar o seu servizo ou, pola contra, están ante unha folga encuberta polo conflito laboral que enfronta a ambas as partes desde hai tempo.
Xa o ano pasado o Concello remitiu varios escritos por casos concretos de traballadores pero nesta ocasión o escrito reclamará que se verifiquen a totalidade das baixas, sobre todo ao ter en conta que estes axentes, tal e como obriga a lei, están a cobrar o 100% do seu salario a pesar de non estar a traballar.
A Policía Local conta actualmente con 125 prazas no seu persoal, pero coas vacantes por xubilación e as que están sen cubrir das ofertas de emprego dos dous últimos anos, os efectivos reais roldan o centenar. Destes, vinte e catro son os que están de baixa.
Relacionadas:
-
A Xustiza dá a razón ao Concello en senllos conflitos laborais coa Policía Local e os bombeiros
Por Redacción |
-
Da Silva, concelleira de Seguridade Cidadá, lembra aos policías de baixa que traballan para a cidadanía
Por Mónica Patxot & Anxo Lourido |
-
Recta final para o 28A: o operativo de seguridade, condicionado polas baixas da Policía Local e o ITU
Por Natalia Puga |
-
As baixas na Policía Local de Pontevedra alcanzan xa a trintena
Por Redacción |
-
Denuncian que o 'multamóbil' da Policía Local circula co airbag desactivado
Por Redacción |
-
Piden o traslado da Policía Local ante as deficiencias atopadas por Inspección de Traballo no Pazo da Cultura
Por Mónica Patxot & Anxo Lourido |