Marín contratará a reforma do acceso á piscina por 142.000 euros
Por Redacción
O Concello de Marín anunciou que nas próximas semanas iniciará a contratación das obras de mellora da accesibilidade á piscina municipal e o inicio dos trámites, cun orzamento de 142.404,96 euros, que supoñerán unha mellora substancial nunha zona que o require e cuxa solicitude foi moi demandada.
O camiño da Raña é o viario que dá servizo ao instituto e outras infraestruturas que se levantan nesta zona.
O camiño, que transcorre desde a rúa de San Pedro como desde a pista a Viñas Brancas, presenta un trazado desordenado, cun pavimento na calzada en mal estado, estacionamento de vehículos desorganizado e sen ningún tipo de beirarrúa ou itinerario peonil definido, o que orixina un tránsito de usuarios sometido a un alto risco de accidente.
Por iso o goberno local entende necesaria unha actuación que palíe esta situación tan comprometida, tanto para o peón, como para o automóbil, e para a administración.
A finalidade, neste ámbito de actuación, será facilitar a accesibilidade e ofrecer seguridade viaria, a través da creación dunha beirarrúa para itinerario peonil adaptado ou practicable, eliminar barreiras arquitectónicas, establecer condicións de accesibilidade, modernizar a iluminación pública, dispoñer espazo para o estacionamento de vehículos, ademais de rehabilitar superficialmente o pavimento da calzada da vía, axardinar as superficies residuais e implantar unha sinalización adecuada no viario.
Deseñáronse os carrís de circulación rodada con anchos de 2,50 e 3 metros, prazas de estacionamento en batería para automóbiles cunha lonxitude de 5 metros e un ancho de 2,50 metros, en mestura bituminosa en quente. As beirarrúas con anchos de 1,50 ou 2 metros, segundo sexa o itinerario practicable ou adaptado, e pendente transversal do 2% vertiendo á calzada, en formigón visto coloreado, encintadas con bordo de formigón prefabricado.
O itinerario peonil, en cruces e accesos, será rebaixado ao nivel da calzada. A beirarrúa remontable, para o acceso de vehículo a unha praza adaptada para discapacitados, bordo sobre a calzada e respectando un ancho mínimo en plataforma de itinerario peonil libre sen obstáculos, entre outras actuacións.
Relacionadas:
-
Inician os traballos de mellora dos accesos á piscina municipal de Marín
Por Redacción |
-
Marín inviste medio millón de euros en obras públicas
Por Oskar Viéitez |
-
Marín prepara unha nova concesión para a piscina municipal
Por Oskar Viéitez |
-
Marín non remunicipalizará a piscina e sacará unha nova concesión
Por Redacción |
-
Marea de Marín quere que o Concello xestione a piscina municipal
Por Redacción |
-
Marín reformará por 142.000 euros o acceso á piscina
Por Oskar Viéitez |