Poio e Meis, na axenda de Cores Tourís
Por Redacción
O delegado territorial da Xunta en Pontevedra, José Manuel Cores Tourís realizou este luns sendas visitas aos concellos de Poio e de Meis con motivo do seu nomeamento.
En Poio, o alcalde, Luciano Sobral, puxo enriba da mesa a mellora dos centros educativos do municipio coma se fixo coa reforma da cuberta do CEIP de Chancelas.
Tamén analizaron ambos a situación da senda que se executará ao longo de 3,5 quilómetros de lonxitude entre Covelo e o límite co concello de Sanxenxo. "Sabemos que o concello está a traballar para conseguir os terreos e agradecemos ese esforzo", dixo Cores Tourís.
Finalmente, tamén se analizou durante a reunión de hoxe a necesidade de continuar a colaborar entre as institucións para conseguir levar a cabo o proxecto de saneamento da ría de Pontevedra.
MEIS
No caso de Meis mantivo unha entrevista co seu alcalde, José Luis Pérez, quen lle transmitiu as principais preocupacións do municipio en relación á actividade da administración autonómica. Foron cuestións relacionadas coas infraestruturas e coa necesidade de axilizar a concentración parcelaria, recordando que tanto Paradela como San Salvador de Meis se atopan en fase de modificacións ou acordo, mentres os sectores I e II de San Martiño-Armenteira se atopan en bases provisionais e Nogueira en bases definitivas.
"Trátase dunha reestruturación das parcelas produtivas das nosas parroquias esencial para poder continuar a dinamizar o rural. A horta e o viñedo segue a ser unha aposta firme e clara de desenvolvemento do noso municipio", explicou o rexedor.
Por outra banda, o alcalde tamén trasladou ao delegado territorial a necesidade de que a Xunta transfira ao concello de Meis un espazo sobrante da execución da rotonda de Curro-Meis, co obxectivo de poder executar nesta zona unha área de recreo e ocio para a cidadanía. José Luis Pérez incidiu tamén na necesidade de humanizar e urbanizar a estrada que enlaza o colexio coa praza de España.
Relacionadas:
-
Os alcaldes de Barro e O Grove trasladan a Cores Tourís as peticións á Xunta
Por Oskar Viéitez |
-
Portas pide axilidade nas concentracións parcelarias de Briallos e Romai
Por Redacción |
-
Cores Tourís sigue de tour, hoxe: Ponte Caldelas, Cambados e Caldas de Reis
Por Oskar Viéitez |
-
Cores Tourís recolle os recados dos alcaldes de Cuntis, Meaño e A Lama
Por Oskar Viéitez |
-
A seguridade viaria, unha das principais preocupacións en Ribadumia e Moraña
Por Redacción |