A feira de Carballedo ten unha media de 400 clientes cada mes
Por Redacción
En apenas cinco citas a feira de Carballedo parece estar plenamente consolidada. As cifras recollidas polo goberno municipal desvelan que tivo unha asistencia global de 2.000 persoas, segundo as estimacións do fluxo de clientes, o que dá unha media de 400 usuarios cada mes.
O mercadiño mensual, que se celebra os segundos venres de cada mes, comezou timidamente nos meses de verán, que foron importantes para asentalo e dalo a coñecer.
En todo caso, e dende o seu inicio, esta cita comercial foi medrando de xeito constante e xa conta cun volume de clientes habitual e consolidado cifrado entre 350 e 450 persoas por feira.
A cantidade de clientes soe variar segundo a climatoloxía e outros aspectos socioeconómicos, pero ata o momento o ascenso de público é crecente e cada edición da feira rexistra novos visitantes.
O presidente de Cerdedo-Cotobade, Jorge Cubela, destacou que "foi un acerto" do goberno local apostar por esta iniciativa, "xa que favorece a dinamización comercial e social de Carballedo como capital do concello, pero tamén de todo o termo municipal e pouco a pouco vaise convertendo nunha cita imprescindible dos veciños".
O crecemento desta feira está a ser, dixo, "paseniño pero constante, o cal é unha moi boa nova, xa que non se trata nin dun boom nin de flor dun día e o que vén unha vez, soe repetir ao mes seguinte".
Por elo, indicou que o executivo ten a intención de seguir apostando por esta feira mensual e quere que siga a medrar ata converterse nunha referencia do concello e da bisbarra. Así, está previsto que ao longo do vindeiro ano se lle dea un novo pulo para seguir captando clientes.
A feira conta na actualidade con entre 20 e 25 postos por edición que ofrecen roupa, calzado, produtos de alimentación, artesanía e pezas de fogar. Tamén conta cun servizo de polbeiría, procedente do concello ourensán do Carballiño. Con todo, non se descarta que a oferta comercial se amplíe o vindeiro ano se segue a aumentar o fluxo de clientes.
Relacionadas:
-
O mercadiño de Carballedo transfórmase o venres nunha edición especial da Feira de Nadal
Por Redacción |
-
O mercadiño de Carballedo cumpre un ano
Por Redacción |
-
Carballedo estrea este venres a Feira de Pascua
Por Redacción |
-
Carballedo estreará este venres a súa feira mensual
Por Redacción |
-
Carballedo celebrará un mercadiño ambulante os primeiros venres de cada mes
Por Oskar Viéitez |