Cotobade recepciona e dá por finalizadas as obras de reforma do Pavillón de Tenorio
Por Redacción
Creada e actualizada
Creada e actualizada
O Concello de Cotobade vén de recepcionar as obras da reforma do Pavillón Municipal de Tenorio e as dá por finalizadas. As obras eran moi necesarias pola grande cantidade de usuarios que viñan gozando das instalacións e que xa se facían pequenas e inoperativas.
Por este motivo, o goberno local atendeu as demandas que no seu día os clubes e os usuarios plantexaran ao alcalde de aumentar o almacén, crear uns novos vestiarios, dotar ao pavillón de servicios públicos e de bancadas que estiveran separadas das gradas.
Todo isto foi unha realidade grazas ao proxecto que presentou o goberno local á Deputación Provincial no ano 2014 e que foi aprobado dentro do Plan de Obras e Servizos.
Á licitación concorreron empresas locais ou con traballadores do concello, dentro dun total de seis ofertas, a adxudicataria foi GPD, cunha oferta de 56.000 euros.
Segundo sostén o rexedor, Jorge Cubela, "o goberno Local segue así a demostrar o seu compromiso coas infraestructuras municipais, coa mellora das instalacións deportivas e o seu apoio ao deporte local, sempre con diálogo e negociación cos principais beneficiarios, como se demostrou neste caso".
CAMPO DE FÚTBOL DAS EXTREMAS
Ademais, o Concello tamén concluíu as obras de renovación e mellora do peche do campo de herba artificial das Extremas.
Estes traballos foron financiados por unha subvención da Consellería de Presidencia e supuxeron un investimento de 50.000 euros.
Con esta actuación conclúen dous anos de obras, coas que se executou a práctica totalidade da renovación do campo de fútbol.