Chega a tempada das vacinas antigripais
Por Redacción
Os pontevedres tiveron este luns a primeira oportunidade de previr a gripe nesta tempada 2015-2015. Comezou oficialmente a nova campaña de vacinación antigripal e antineumocócica, que estará vixente durante dous meses, ata o próximo 19 de decembro. De forma simbólica, este luns inaugurouna o xerente da área de Xestión Integrada de Pontevedra e O Salnés, José Manuel González, vacinándose no Hospital Provincial.
En Pontevedra haberá este outono 250 puntos de vacinación, repartidos entre centros de saúde e consultorios, centros hospitalarios públicos, hospitais e consultas médicas privadas; as residencias e centros para a terceira idade; as unidades asistenciais de drogodependencias; os centros penais e os centros de atención a discapacitados.
Os interesados en vacinarse na provincia de Pontevedra deben poñerse en contacto co seu centro de vacinación habitual, onde lles informarán de como solicitar a cita. As persoas con 60 ou máis anos, así como aquelas que sufran enfermidades crónicas, deben acudir ao seu médico de cabeceira ou centro de saúde onde serán informados das vacinas que deben recibir.
A Xefatura Territorial da Consellería de Sanidade en Pontevedra reitera á cidadanía que a vacinación durará máis de oito semanas e hai tempo suficiente para facela progresivamente. Por isto, solicitan á poboación que, para evitar a sobrecarga do sistema asistencial da provincia, non se acuda masivamente os primeiros días da campaña.
Como novidade, Sanidade poñerá en marcha unha páxina web (http://gripe.sergas.es) con información tanto para profesionais sanitarios con información técnica e de xestión, como aspectos prácticos para a cidadanía.